Тешките алергиски реакции на храната се помалку сериозни кај доенчињата отколку кај малите и поголемите деца, покажала новата студија. Имено, се покажало дека кај доенчињата анафилаксата предизвикана од храна е многу послаба отколку кај постарите деца.
Анафилаксата претставува алергиска реакција на целото тело, која може да вклучи срцеви и респираторни проблеми. Кај постарите деца, анафилаксата предизвикана од храна, дури може да биде и опасна по живот, додека кај доенчињата предизвикува главно само осип и повраќање.
Гастроинтестиналните симптоми на анафилакса се почести кај доенчињата (89 проценти), отколку кај малите (63 проценти) и големи (60) деца. Кашлицата и другите респираторни симптоми се почести кај постарите деца
Ако доенчето развие само благ осип или гастроинтестинални симптоми по обидот за консумирање на нова храна, родителите, секако, треба да поразговараат со педијатар за таа реакција. Во случај на појава на повеќе симптоми и влошување на состојбата на детето, треба да побарате итна медицинска помош, пишува „Annals of Allergy, Asthma and Immunology“.
