Зимскиот период е време на настинки и грип, кои можат и да се одбегнат доколку внимавате на исхраната која влијае врз зајакнување на вашиот имунитет. Во продолжение, прочитајте кои се топ 5 овошја кои ќе ви помогнат да не се разболите во зима.
Лимон – грипот бега од него
Лимонот е дефинитивно број еден кога станува збор за здравјето во овој период од годината. Сокот од еден лимон задоволува половина од потребниот внес на витамин Ц на дневна основа. Одличен е за забите, непцата, крвните садови, кожата и воопшто, за зајакнувањето на имунолошкиот систем. Додадете половина сок од лимон во чаша вода или утринска шолја чај за да ја осигурате потребна енергија на организмот и да ги задржите грипот и настинката што е можно подалеку од вас.
Киви – го одржуваат крвниот притисок стабилен
Дали знаевте дека ова вкусно овошје содржи иста количина на калиум како бананите, но и двапати помалку калории? Калиумот ни помага да го одржиме крвениот притисок стабилен со одржување на балансот на електролити во телото. Покрај тоа, кивито содржи двојно повеќе витамин Ц отколку портокалот и е одличен извор на антиоксиданти во форма на витамин Е.
Грејпфрут – содржи фолна киселина
Уште еден освежувачки цитрус кој го зајакнува имунитетот. Еден грејпфрут со средна големина содржи околу 80 % од дневната доза на витамин Ц. Исто така, има влакна, витамин А и малку калории. Во неговиот состав е и фолната киселина која е од суштинско значење за растот на клетките. Црвениот грејпфрут содржи ликопен – фитохемикалија која има антиоксидантска активност и го штити телото од слободните радикали и различни видови на рак (рак на дојка, рак на простата и рак на белите дробови).
Урми – богати со железо
Бидејќи се богати со влакна, само неколку вкусни урми ќе ве држат сити подолго време. Тие, исто така, содржат многу витамин А, кој игра улога во зачувувањето на видот. Одличен извор се на железо и богати се со фосфор, кој е познат и како „храна за мозокот“. Урмите содржат природни шеќери, како што се гликоза и фруктоза, така што брзо ја обезбедуваат потребната енергија за мозокот и мускулите.
Брусници – моќна комбинација на витамини Б и Ц
Моќната комбинација на витамините Б и Ц, железо и манган во брусниците, ги прави одлично овошје за зајакнување на имунитетот. Затоа тие се многу добар избор како здрава закуска во текот на зимските месеци. Исто така, богати се со витамин А, кој помага да се зачува добриот вид и здравата кожа.
