Скопје, 20 март, 2020– Во земјава е регистриран прв педијатриски случај со коронавирус. Станува збор за девојче на четиригодишна возраст, која претходно била во контакт со заразено лице во градинка во Англија. По враќањето во земјава, детето и мајката биле во самоизолација, но пред два дена девојчето појавило симптоми, веднаш било тестирано и вирусот бил потврден.
Во текот на денешниот ден, утврдено е и дека нејзината баба е позитивна на коронавирусот. По утринските тестирања, вкупниот број на пациенти заразени со коронавирус, изнесува 70.
И покрај тоа што, до утрово била во стабилна, состојбата на едната пациентка на Клиниката за инфективни болести која е приклучена на респираторна машина е влошена, но лекарите превземаат се што е нивна моќ да ја стабилизираат. Кај останатите пациенти, состојбата е иста – стабилна.
Во насока на комплетна здравствена нега, односно достапност на интервенции од сите медицински гранки, за сите нови, но и претходни случаи на зазразени со коронавирус, во функција ќе биде ставена Градската општа болница “8 Септември“, каде ќе биде воспоставен алгортиам. Таму сите евентуални пациенти со коронавирус и оние кои се сомнителни, а на кои им е потребна некаква друга форма на хируршка или друг тип на интервенција, директно ќе бидат згрижени, за да не одат по другите јавно-здравствени институции.
Според министерот за здравство, Венко Филипче наредниве неколку дена ќе се работи на план за отворање на посебни пунктови во рамките на Здравствениот дона на Скопје, каде ќе може да се спроведе најавениот ран скрининг за откривање на можни новозаразени пациенти со коронавирус.
“Исклучително добро е тоа што пациентите засега се откриваат во рана фаза, заради тоа што само пациенти кои се откриваат во доцна фаза директно ги зафаќаат местата во одделите за интензивна нега – нешто што во многу земји го колабира здравствениот систем“, изјави ресорниот министер.
