Kога станува збор за туширање, повеќето луѓе го практикуваат или наутро или навечер. Која од овие две опции е поздрава? Некои експерти тврдат дека вечерното туширање води до поквалитетен сон, додека други сметаат дека е подобро да се туширате наутро, бидејќи така побрзо се расонуваме и мозокот побрзо почнува да работи. Иако и двете опции имаат свои предности и недостатоци, дерматолозите сметаат дека е поважно да се истушираме навечер пред спиење, бидејќи на тој начин ќе се ослободиме од потта, маслата и алергените кои сме ги акумулирале во текот на денот, и поради тоа подобро ќе спиеме, а кожата ќе ни биде посјајна.
Во текот на денот на кожата се собираат алергени
„Ако цел ден сте работеле надвор или сте вежбале и сте се потеле, дефинитивно треба да се истуширате пред спиење”, вели дерматологот Самер Џабер, додавајќи дека до крајот на денот телото е прекриено со сите видови на алергени кои можат да ја иритираат кожата. Покрај тоа, дерматологот напоменува дека е од клучно значење да се измие лицето навечер зашто на тој начин го спречувате таложењето на маснотии на перницата и појавата на акни.
Тушот како антистрес терапија
Туширањето ја регулира температурата на телото, што може да помогне полесно да заспиете и подобро да спиете. Многу студии покажаа дека е најдобро да се истуширате 90 минути пред да заминете во кревет, бидејќи така му давате на телото доволно време да се загрее, па повторно да се разлади на соодветна температура за спиење. Тушот делува како антистрес терапија бидејќи го намалува нивото на хормонот кортизол, кој се излачува како одговор на стресни ситуации.
Вашата кожа се регенерира ноќе, што значи дека додека спиете, ослободувате мртви клетки и градите нови. Затоа дерматолозите советуваат барем да се замиете пред да одите на спиење, ако веќе не се туширате, иако е најдобро да завршите се одеднаш и да се ослободите од изумрените клетки на кожата, бидејќи така наутро ќе изгледате посвежо и поодморено.
