Се чини дека изложеноста на антиобиотици е поврзана со развојот на рак на дебело црево, особено кај младите и може да придонесе за зголемување на зачестеноста на раниот рак на дебело црево, укажува нова студија.
Анализата сугерира дека историјата на употреба на антибиотици кај лица помлади од 50 години го зголемила ризикот од развој на рак на колонот, но не е и на ракот на ректумот, за 49 проценти.
Ова е прва студија што ја поврзува употребата на антибиотици со растечкиот ризик од ран развој на рак на дебело црево, болест која во последниве две децении се зголеми со брзина од најмалку 3 проценти годишно, истакнуваат стручњаците.
Нездравата храна, засладените пијалаци, дебелината и алкохолот, најверојатно, играле улога во овој пораст, но податоците ја истакнуваат важноста од избегнување на непотребна употреба на антибиотици, особено кај деца и млади.
Претходните студии покажале дека кај повозрасни лица, значителни промени во структурата и разновидноста на цревниот микробиом предизвикан од антибиотици, влијаат на развојот на колоректален карцином. Но, влијанието на употребата на антибиотици врз раниот колоректален карцином досега не е истражувано.
