Пушењето, камењата во бубрезите, хроничното воспаление на бубрезите, како и изложеноста на одредени хемикалии придонесуваат за појава на рак на бубрезите. Поради зголемената употреба на ултразвук, ова заболување се повеќе се открива како случаен наод при преглед на абдоменот. Кај туморите кои не се прошириле во околината, хируршкото отстранување дава шанса за излекување. Постоперативната примена на имунотерапија и во поново време целните биолошки лекови донесоа позитивни промени во преживувањето кај пациентите кај кои поради ширењето на болеста не е можна радикална операција.
Постојат неколку видови на рак на бубрезите. Ракот на бубрежните клетки (аденокарцином) е најчест и чини 85% од сите дијагностицирани случаи на рак на бубрези. Значително поретки се: бубрежниот сарком и Вилмсов тумор, кој често се дијагностицира во детството.
Анатомија на бубрезите
Бубрезите се парни органи со овална форма, сместени во задниот дел на абдоминалниот ѕид, на ниво на горните лумбални пршлени. Десниот бубрег обично лежи малку пониско во споредба со левиот, поради тоа што црниот дроб се наоѓа над него. Бубрезите се црвеникаво-кафени по боја, кај возрасно лице долги околу 10 сантиметри и со големина на стегната тупаница. Бубрегот е обвиткан во сврзна капсула околу која има слој од масно ткиво кое го зацврстува бубрегот во неговата положба.
Главната улога на бубрезите е да ја филтрираат крвта, со што од организмот се отстрануваат штетните продукти на метаболизмот, токсините, лековите, вишокот сол и течности. Крвта за филтрација во бубрегот ја доведува бубрежната артерија, додека прочистената крв од бубрезите ја земаат бубрежните вени. Од вишокот вода и штетните материи во бубрезите се создава урина. Урината што се формира во бубрежните канали се собира во капка, од каде преку уретерот се дренира до мочниот меур и понатаму се преку уретрата се излачува надвор од телото.
Освен излачување на штетните материи и вишокот вода од организмот преку урината, бубрезите имаат и неколку дополнителни функции:
- Регулација на киселоста на телесните течности (ацидобазна рамнотежа)
- Излачување на хормони (еритропоетин, ренин, простагландини)
Како да се открие ракот на бубрезите
Ракот на бубрези во почетокот на дава никакви симптоми, па во тој стадиум се открива случајно, во рамките на систематските прегледи или во тек на преглед поради некои други тегоби.
Три симптоми што се појавуваат истовремено:
- болка во делот помеѓу долните ребра и карлицата, на задниот дел од телото.,
- крв во урината (хематурија) и
- маса која може да се напипа во лумбалниот дел или долниот дел на грбот, во медицината е опишана како типичен знак за рак на бубрегот.
Меѓутоа, таквата комбинација на симптоми се јавува само кај 10% од пациентите. Од општите симптоми, најчесто се јавуваат:
- губење на телесна тежина,
- замор,
- покачена телесна температура,
- исцрпеност,
- анемија и слично.
Ракот на бубрези може да се манифестира и со низа симптоми кои без внимателен третман тешко се поврзуваат со бубрегот. Тоа може да бидат лабораториски промени како еритроцитоза, хиперкалцемија, хипогликемија или продолжено протромбинско време. Понекога како прв знак на рак на бубрезите може да се појави хипертензија.
