Синдромот на полицистични јајници не е опасен по живот, но доколку не се открие и не се лекува навреме може да го зголеми ризикот од други болести. Ова се симптомите на кои секоја жена треба да посвети внимание…
Повеќето жени кои водат борба со синдромот на полицистични јајници имаат цисти на јајниците. Тие не се опасни по животот, но можат да предизвикаат хормонална нерамнотежа. Недијагностициран и нелекуван синдром на полицистични јајници го зголемува ризикот од појава на други болести, како што се болестите на кардиоваскуларниот систем и дијабетес тип 2.
Синдромот на полицистични јајници може да предизвика промени и пореметувања во менструалниот циклус. Погледнете кои се најчестите симптоми на полицистични јајници на кои треба да посветите внимание.
Проблеми со плодноста
Една од најчестите компликации на синдромот на полицистични јајници се потешкотиите со зачнување. За жал, голем број жени откриваат дека боледуваат од полицистични јајници дури кога ќе посакаат да забременат. Некои жени успеваат да забременат и без медицинска помош, додека други мораат да побараат лекарска помош.
Менструални тегоби
Истражувањата покажале дека менструалните проблеми и потешкотии се еден од најчестите симптоми на синдромот на полицистични јајници. Ако циклусот ви трае подолго од 35 дена или немате менструација 4 месеци или подолго, појдете на гинеколог.
Прекумерна влакнетост
Прекумерна влакнетост, состојба позната под името хирзутизам, е еден од најчестите симптоми на полицистични јајници. Се јавува заради зголемено ниво на хормонот андроген. Прекумерна влакнетост ќе забележите во делот на стомакот, рацете, грбот, градите и лицето.
Акни
Истражувањата покажале дека жените кои боледуваат од синдромот на полицистични јајници иммаат за 50 проценти поголем ризик од појава на акни, митесери. Акните може да се појават по целото тело, вклучително и градите, грбот, лицето и рамениците.
Неквалитетен сон
Несоницата или неквалитетниот сон е мошне чест симптом. Жените кои боледуваат од синдромот на полицистични јајници многу често боледуваат и од несоница и апнеја.
Хроничен замор
Жените кои боледуваат од синдромот на полицистични јајници честопати истакнуваат дека имаат проблеми со одржувањето на нивото на енергија. Хроничниот замор речиси секогаш е симптом на некоја болест и пореметување. Освен синдромот на полицистични јајници, причини за хроничен замор можат да бидат и хипотиреоза, анемија и ниско ниво на витаминот Б12.
Надуеност
Синдромот на полицистични јајници влијае на работата на системот за варење и може да предизвика надуеност, гасови и запек. Консумирањето на одредени намирници често ја влошува надуеноста, а тоа се најчесто гравот, брокулите, зелката и карфиолот.
Депресија
Хормоналната нерамнотежа најчесто предизвикува нагли промени на расположението. Истражувањата покажале дека синдромот на полицистични јајници може да го зголеми ризикот од појава на депресија и анксиозност.
