Ако вашето дете има испади на бес, го тепа братчето или сестричката, непослушно е и грубо, добро размислете пред да се сетите на тепањето како воспитна мерка. Статистичките податоци покажуваат дека родителите чувствуваат силна грижа на совест откако ќе го истепаат детето, а покрај тоа, ќотекот и не е ефикасен начин за решавање на проблемите.
Кога ќе го удрите детето, моментално постигнувате резултат – тоа почнува да плаче и престанува да го прави она што не му е дозволено. Меѓутоа, не постојат докази дека овој метод е ефикасен на долги патеки.
Ако подоцна го прашате детето кое добило ќотек зошто тоа се случило, детето ќе се сеќава на емоциите и драмата, но не и на причината за тепањето.
Не е лесно да се биде родител
Не е лесно да се биде родител и понекогаш ви се случува едноставно да „пукнете“. Кога ќе почувствувате дека се спрема експлозија, постојат неколку стратегии кои може да се применат за да ја избегнете пресметката. Најважно е да направите растојание помеѓу себе и детето и да не бидете насамо со него. Кога станува збор за мали деца, препуштете им ги на некој друг или ставете ги во количка и прошетајте. Излегувањето ќе ја намали емоционалната температура и двајцата ќе ве смири.
Тајмаут
Многу е тешко да се справите со детските испади на бес. Но најдобро е да го оставите да беснее, па кога ќе прсне да плаче, пријдете му, подигнете го и помилувајте го. На крајот ќе престане. Кога станува збор за деца постари од три години, повеќето експерти препорачуваат тајмаут. Кажете му на вашето дете да отиде во неговата соба на одредено време, па одморете се еден од друг. Психијатрите советуваат тоа да не биде подолго од десет минути. Со овој чин нема да го казните детето, туку ќе му покажете дека одредено негово однесување не е прифатливо. И кога низ тоа мора да поминуваат безброј пати, на крајот ќе им се здосади.
