Дури ни 12 јајца неделно не го зголемуваат ризикот од кардиоваскуларни болести кај луѓето во фаза пред дијабетес или кај оние кои веќе страдаат од дијабетес тип 2, покажала неодамнешната студија.
Истражувачите од Универзитетот во Сиднеј конечно го урнаа митот за консумацијата на јајца и нивното влијание врз нашето здравје. Имено, екипата која учествувала во студијата спровела експеримент кој покажал дека ни 12 јајца неделно не ги зголемуваат шансите за кардиоваскуларни болести кај луѓето кои имаат предиспозиција да добијат дијабетес или кај оние кои веќе имаат дијабетес тип 2.
- Предрасудите секогаш тргнуваат од фактот дека жолчката има премногу холестерол, влијае на високиот крвен притисок и шеќерот
„Наспроти советите, кои можете да ги прочитате во многу изданија за диети, нашата студија покажа дека не мора да се воздржувате од јајца и дека токму тие ја прават диетата здрава“, изјавил д-р Фулер, автор на студијата, додавајќи дека предрасудите секогаш тргнуваат од фактот дека жолчката има премногу холестерол, влијае на високиот крвен притисок и шеќерот.
Студијата покажала дека кај пациентите кои страдаат од дијабетес тип 2, ниту една од овие состојби не била предизвикана од оваа бројка на консумирани јајца поради што оваа теорија паѓа во вода.
„Јајцата се извор на протеини и микронутриенти кои го поддржуваат нашето здравје – нашиот вид, срцето, крвниот притисок и здравата бременост“, заклучил д-р Фулер.
