Сувото грозје се произведува со сушење на грозје на сонце или со механички процес на сушење во специјални сушилници. Нутритивно гледано, се карактеризира со изобилство на калиум, магнезиум, цинк, бакар, калциум и железо, како и витамини А и Б комплекс.
Содржи значителна количина на железо, што директно помага во лекување на анемија, додека високата содржина на бакар помага при создавање црвени крвни клетки. Станува збор за идеална високоенергетска закуска за поладните денови, која експресно ја надоместува изгубената енергија. Покрај тоа, сувото грозје без проблем може да го измами гладот поради тоа што е исклучително богато со растителни влакна.
Освен што одлично оди во комбинација со ореви, овошје, јогурт или мед и е совршено за почеток на денот, сувото грозје е идеално и како гарнир со ориз, кускус и зеленчук со секое парче месо. Поради слаткиот вкус и структура, совршено е за полнење месо од живина. Оди во сите колачи, леб, пецива, компоти, пудинзи и кремови, а е незаобиколен додаток во штрудли, сладолед… Во зима често се додава и во варено вино.
