Штом забележите дека ве боли грлото, ве гребе или пецка, би било добро да се придржувате до некои од општите совети кои би можеле да ги ублажат болките и да го забрзаат опоравувањето.
За почеток, зголемете го внесот на течности (особено топли напитоци, супи и чорби) – на тој начин ќе ја хидрирате слузокожата на грлото и привремено ќе ја ублажите болката. Испирањето на грлото со млак чај од жалфија или мајчина душица или, пак, солена вода би требало, исто така, да ја ублажи иритацијата.
Доколку сте пушач, тогаш одбегнувајте ги или барем намалете ги цигарите. Исто така, не го напрегнувајте гласот и заштитете го вратот со шал или марама доколку излегувате на ладен воздух. Имајте на ум дека греењето го исушува воздухот, па би било добро да користите навлажнувач за воздух или во близина на радијаторот да ставите сад со вода.
Обавезно побарајте совет од лекар доколку и покрај сите овие споменати решенија болката во грлото не поминува и по неколку дена или доколку имате температура и потешкотии со голтањето.
