За овие симптоми на многу жени и девојки не им е пријатно да зборуваат, а уште потешко им е да го решаваат проблемот. Но пред да тргнете во „војна“, добро е да ги знаете и другите причини кои имаат слични симптоми на вагинална инфекција.
Чешање заради стилот на живот
Кога чеша надворешниот дел од вагината, можно е да се работи за дерматитис или воспаление на кожата (избивања на кожата во вид на осипи, рани, меурчиња). Причина може да е употребата на тапи жилети, носење тесни панталони, долна облека натопена со пот, на пример, за време на вежбање…
Чешање после сексуален однос
Ако со партнерот сте користеле лубрикант, тоа може да е една од причините. Многу од нив содржат алкохол, што може да е мошне иритирачко за вагиналното подрачје. Некои жени се и алергични на латекс – составен дел од кондомите.
Чешање заради ниско ниво на естроген
Пониското ниво на естроген главно е врзано за менопаузата, а ја менува Пх рамнотежата во родницата, па ѕидовите стануваа тенки и суви. Последиците се болен сексуален однос, чешање, иритација.
Чешање како резултат на употреба на разно-разни хигиенски производи
Премногу сапун може да ја наруши бактериската вагинална рамнотежа. Производите за вагинална хигиена не би требало да содржат парфеми, туку да се нежни и што е можно поприродни.
Чешање предизвикано од бактериска вагиноза
Се случува кога доаѓа до нерамнотежа од различни видови бактерии кои природно живеат во вагината, особено гарднерела вагиналис. Овој симптом порано се нарекувал вагинитис, но со оглед на тоа дека ги нема сите особини на воспаление терминот повеќе не се користи. Бактериската вагиноза по правило не предизвикува чешање, но ако е во комбинација со габична инфекција или нешто друго, тогаш чешањето е присутно. А симптомите се исклучително непријатен мирис (потсетува на риба) и има сивкаст исцедок. Може да се јави и кај полово неактивните жени и девојки.
