Супербактерија отпорна на сите познати антибиотици се шири во болниците ширум светот, предупредија австралиските научници. Научниците од Универзитетот во Мелбурн открија три варијанти на супербактерија отпорна на антибиотици во примероци од десет земји, вклучувајќи и соеви во Европа, кои се отпорни на сите лекови што се моментално достапни на пазарот.
„Почнавме во Австралија, но го проширивме истражувањето и ја откривме бактеријата во многу земји и во бројни установи низ целиот свет“, изјавил Џозеф Хајден, раководител на микробиолошката лабораторија на Универзитетот.
Бактеријата позната како Staphylococcus epidermidis е поврзана со MRSA (Methicillin-resistant Staphylococcus aureus)
Оваа бактерија може природно да се пронајде на човечката кожа, а најчесто со неа се заразуваат постари лица или пациенти со имплантирани протетски материјали, како што се катетри и замени за зглобови.
„Може да биде смртоносна, но обично тоа се случува кај пациенти кои се веќе тешко болни или се на болничко лекување. Тешко е да се победи и инфекциите може да бидат тешки“, додал Хајден
Неговиот тим проучувал стотици примероци на Staphylococcus epidermidis од 78 светски болници и открил соеви, кои со мала измена во нивната ДНК, станале отпорни на двата најчести антибиотици со кои се лекуваат болничките инфекции.
„Овие два антибиотика не се слични во составот и не очекувавме да се развие отпорност на двата“, изјавила Џин Ли, коавторка на истражувањето.
Експертите веруваат дека супербактеријата брзо се шири поради прекумерната употреба на антибиотици на Одделите за интензивна нега, каде се пациентите најболни, па и најсилните лекови се препишуваат рутински.
-
Светската здравствена организација веќе долго време предупредува дека прекумерната употреба на антибиотици го поттикнува развојот на отпорни и смртоносни соеви на бактерии
Хајден изјавил дека неговата студија, објавена во списанието „Nature Microbiology“, ја потенцира потребата од подобро разбирање на начинот на кој се шират инфекциите.
„Имајќи ги предвид сите бактерии во болниците, нема сомневање дека отпорноста на антибиотиците е една од најголемите опасности во болничкото лекување ширум светот“, истакнал Хајден.
