Сексот, дрогата и роненролот не звучат баш како рецепт за здрава старост, но дали Мик Џегер е доказ за спротивното? 75-годишникот го предводи бендот на којзнае која по ред турнеја, а на сцената е еднакво енергичен како и претходно, неверојатно подвижен, издржлив и очигледно се уште во одлична форма.
Мик добрите гени ги наследил од својот татко, наставник по физичко кој редовно вежбал и доживеал 93 години, но што е уште поважно, стариот рокер кој својата виталност ја докажа и кога по осми пат стана татко, живее неверојатно здрав живот и и тоа како внимава на себе.
Исхрана
Стоунси имаат цела чета од двесте луѓе, меѓу кои и нутриционисти, па со помош на нивните совети Мик го одржува обемот на половината 71 см. На неговото мени главно има свежо овошје и зеленчук, житарки, мешунки, пилешко и риба. Повремено се придржува и на кето диета која вклучува многу масти и белки, а речиси воопшто јаглехидрати, па тоа му помага во брзото губење килограми и масно ткиво.
Обожава авокадо, кое е одличен извор на здрави маснотии, а за појадок сака смути, но затоа четири часа пред концерт јаде полна чинија паста за мускулите да му се полни со гликоген. Според советот на Џо Вуд, поранешната жена на гитаристот Рони Вудс, Џегер веќе со години јаде органска храна.
Тренирање
Џегер не би можел да претрча полумаратон од 21 км, колку што наводно поминувал движејќи се на секој концерт, редовно да не тренира. Меѓу турнеите пејачот открива дека трчал по 10 км на ден, возел велосипед, пливал, се бавел со кик-бокс и вежбал, и така пет до шест дена неделно. Верен соработник во тоа му е Норвежанецот Торје Еике, физиотерапевт кој работел со олимпијци, а со Џегер е веќе 24 години.
Јога
Џегер шест дена во неделата вежба и таканаречена воздушна или антигравитациска јога – комбинација на гимнастика и акробација која се изведува висејќи на мрежи од ткаенина обесени од плафонот. Вежбите се мошне напорни, но помагаат не само во истегнувањето и флексибилноста, туку и за психичко опуштање.
Балет
Некои велат дека Џегер се бавел со балет и пред да ја запознае Мелани Хемрик, 43 години помладата американска балерина која минатата година му го роди осмото дете, синот Деверукс Октавијан Басил, додека други тврдат дека балетските вежби почнал да ги практикува дури покрај неа. Како и да е, овој вид тренинг е напорен, но одличен за рамнотежата и линијата. Мелани само четири месеци по породувањето се врати на сцената на престижниот Американски балетски театар во кој е една од двете балерини кои имаат деца.
Витамини
На времето Стоунси голтале разно-разни таблети, но веќе одамна се префрлиле на значително поздравите витамини. Џегер редовно зема витамин А, Б комплекс, Ц, Д и Е во комбинација со рибино масло, гингсенг и гинко билоба.
Нега на лицето и косата
Џегер многу внимава на својот тен, па редовно употребува хидратантни креми, а со косата има среќа затоа што му е природно густа.
Апстиненција!
Џегер пие, но умерено. Тврди дека никаква дрога не допрел со години, а не само што не пуши, туку и не сака да е во близина на некој кој пуши.
Слух
Многу пред ова да стане стандард, Џегер неизоставно употребувал чепчиња за уши за да си го заштити слухот од вревата која ја произведуваат на пробите и концертите.
