Додека семето од чиа е малку попопуларно и се користи во каша или дури и како пудинг, лененото семе е занемарена храна на која треба да почнете да обрнувате внимание. Особено кога ќе сфатите на кој начин овие ситни семки можат да имаат значајни позитивни ефекти врз вашето тело.
Од подобрување на варењето до намалување на ризикот од болести, постојат многу начини на кои консумирањето ленено семе може позитивно да влијае на вашето долгорочно здравје.
Лененото семе е полно со растителни влакна
Ако барате лесен начин да го зголемите внесот на влакна, вклучувањето на ленено семе во вашата исхрана е одлично решение. Една лажичка ленено семе има речиси три грама влакна, што е еднакво на 11 проценти од препорачаниот дневен внес.
Според Американската асоцијација за срце, треба да внесувате 25 до 30 грама влакна дневно. Исхраната со ниска содржина на влакна не само што има негативно влијание врз губењето на тежината, туку може да предизвика и проблеми со варењето, па дури и да го зголеми ризикот од развој на хронични заболувања.
Додавањето ленено семе во вашиот појадок е одличен начин да започнете. Можете да измешате ленено семе во каша, јогурт или смути.
Тоа е богат извор на омега-3 масни киселини
Лененото семе е богато со алфа-линолна киселина (ALA), вид есенцијална масна киселина што телото не може да ја произведе. Единствениот начин да ја добиете е преку храна, а лененото семе е полно со оваа киселина.
Докажано е дека консумирањето омега-3 масни киселини го намалува воспалението во телото, што може да помогне во спречувањето на развој на хронични заболувања. ALA е поврзана конкретно со намалување на ризикот од развој на срцеви заболувања како што е срцев удар, како и со намалување на високиот крвен притисок.
Тоа има позитивен ефект врз здравјето на срцето
Како што споменавме претходно, ALA може да помогне во намалувањето на ризикот од развој на срцеви заболувања. Според студија објавена во списанието „Advances of Nutrition“, постојат силни докази дека консумирањето ALA го намалува ризикот од кардиоваскуларни заболувања.
Ова се должи на фактот дека ALA е полинезаситена масна киселина која има антиинфламаторно дејство врз телото и е докажано дека го намалува ризикот од срцеви заболувања.
Студиите, исто така, покажаа дека консумирањето ленено семе може да помогне во намалувањето на нивото на холестерол во крвта. Тоа, исто така, помага во намалувањето на крвниот притисок, што е важно за превенција од срцев удар.
Лененото семе помага во варењето на храната
Лененото семе е популарно познато како природен лаксатив, кој може да помогне во процесот на варење.
Студија објавена во списанието „Nutrition&Metabolism“ покажа дека лененото семе (кога се додава во печива) ги намалува симптомите на запек, како и нивоата на гликемија и липиди, кај оние со дијабетес тип 2.
Тоа помага во одржувањето на телесната тежина
Одржувањето на здрава тежина е важно за одржување на здравјето на вашето тело на долг рок, па затоа вклучувањето на ленено семе во вашата исхрана може да биде клучно за одржување на здрава тежина.
Исто така, влакната во ленено семе можат да ви помогнат да се чувствувате сити подолго време, пишува Eat This Not That, пренесува N1 Zagreb.
