Јужнокорејските здравствени стручњаци ги проучуваат можните објаснувања на малиот, но растечки број на лица кои се опоравиле од болеста КОВИД-19, а повторно на тестирањето на коронавирус се позитивни и сè се посклони дека станува збор за рецидив.
Како можни причини за позитивни тестови на коронавирус по преболената болест, стручњаците наведуваат повторна зараза, рецидив или непрецизни тестови.
Јужна Кореја информираше за 141 таков случај досега, според корејскиот центар за контрола и превенција на болести.
ПОВТОРНА ИНФЕКЦИЈА ИЛИ РЕЦИДИВ?
Иако повторната зараза би била сценарио кое најмногу загрижува бидејќи упатува на тоа дека не се развил имунитет, и центарот за контрола и превенција на болести и други стручњаци, велат дека тоа е малку веројатно објаснување.
Наместо тоа, корејскиот центар објави дека е склон кон заклучокот дека станува збор за некој вид на рецидив, односно реактивација на вирусот.
Тоа би значело дека делови на вирусот “се успиваат“ на некое време или дека некои пациенти имаат состојби кои го слабеат имунитетот, поради што се поподложни на тоа да вирусот во нивните тела повторно оживее, објаснуваат стручњаците.
Неодамнешно истражување на лекари во Кина и САД покажало дека новиот коронавирус би можел да ги оштети Т лимфоцитите, познати како Т клетки кои играат клучна улога во имуниот систем и во неговата способност да се бори против инфекции.
Ким Јеонг-ки, виролог на Универзитетот за фармакологија во Кореја го споредил рецидивот по опоравувањето на заболен, со федер кој потскокнува откако ќе се ослободи.
“Кога федерот ќе го притиснете тој станува понизок, но кога ќе ја тргнете раката, тој се растегнува“, вели тој.
Ако се утврди дека се работи за рецидив, а не за нова зараза, тоа покажува дека епидемиолозите мора да размислуваат за нови предизвици за ограничување на ширењето на вирусот.
“Јужнокорејските здравствени власти се уште не откриле дали имало случаи во кои тие ‘реактивирани’ пациенти го пренеле вирусот на трето лице, но ако таквиот пат на зараза се потврди, тоа би било огромен проблем“, вели Сеол Даи-ву, стручњак за развој на вакцини на Универзитетот Чунг-Анг.
ОГРАНИЧУВАЊЕ НА ТЕСТОВИТЕ
За пациентите во Јужна Кореја се смета дека немаат веќе вирус во себе, кога два последователни теста во период од 48 часа се негативни на коронавирусот.
Тестовите RT-PCR, кои ги користи Јужна Кореја, се сметаат за сигурни, но стручњаците предупредуваат дека секогаш постои можност за лажни или недоследни резултати во мал број случаи.
“RT-PCR тестовите се точни во 95% од случаевите. Тоа значи дека може да има до пет проценти на оние со лажно негативни или лажно позитивни резултати“, вели Ким Јеонг-ки
Стручњаците дека остатоците на вирусот во организмот може да бидат во многу мали концентрации да тестот повеќе не може да ги открие.
Од друга страна, тие тестови може да бидат и толку чувствителни да регистрираат мали, потенцијално безопасни количини на вирусот и даваат нов позитивен резултат, иако пациентот целосно се опоравил, вели Квон Јун-вок, заменик директор на центарот за контрола и превенција на болести во Јужна Кореја.
Резултатите од тестирањата може да бидат и неточни, додава тој, и ако брисевите не се земени на правилен начин.
