Кај луѓето кои се во добра физичка форма се забележани полесни мозочни удари, покажало истражувањето на шведските научници од Универзитетот во Гетеборг.
Податоците потврдиле дека физички активните лица имаат помал ризик да доживеат мозочен удар.
Истражувачите истакнале дека оваа појава била забележана и кај умерено физички активните лица во постаро животно доба кои пешачат 30 минути на ден.
-
Истражувањето на шведските научници сугерира дека дури и едноставната мала физичка активност може да има големо влијание подоцна со евентуално намалување на сериозноста на мозочниот удар.
„Мозочниот удар е главна причина за сериозни инвалидитети, па затоа изнаоѓање начини за спречување на мозочниот удар или намалување на инвалидитетот предизвикан од него, се важни“, истакнала авторката на студијата Катрина Сунерхаген, доктор на науки, од Универзитетот во Гетеборг, Шведска, во соопштение за печат. „Додека вежбањето има бенефит за здравјето на многу начини, нашето истражување сугерира дека дури и едноставната мала физичка активност може да има големо влијание подоцна со евентуално намалување на сериозноста на мозочниот удар“.
За ретроспективната студија, истражувачите испитувале два шведски регистри за мозочен удар и избрале 925 лица со просечна возраст од 73 години кои имале мозочен удар. Во регистрите, исто така, имало и податоци за сериозноста на мозочните удари.
Како што пишува научното списание „Neurology“, полесните или благи мозочни удари сочинувале 89 % од мозочните удари кај физички активните лица и 73 % од мозочните удари кај оние кои се помалку активни.
Со цел да се процени нивото на физичка активност, луѓето кои учествувале во студијата биле интервјуирани по нивниот мозочен удар, и биле запрашани да кажат до кој степен на физичка активност биле ангажирани пред да имаат мозочен удар. Истражувачите поставувале прашања за подобро да го разберат интензитетот и времетраењето на физичката активност со цел да ја измерат просечната количина на физичка активност. Истражувачите, исто така, ги интервјуирале и членовите на семејството и роднини за да го потврдат степенот на вежбање во ситуации кога тоа било можно.
