Бактеријата Klebsiella pneumoniae припаѓа на грам- негативните бактерии од видот Enterobacteriaceae кои предизвикуваат инфекции во човековиот организам. Бактеријата може да се појави урината, белите дробови, крвта или во мозокот.
Инфекциите најчесто се закана за луѓето со послаб имунитет, бремените жени, дијабетичарите и луѓето кои страдаат од полово преносливи болести. Пренесувањето на Klebsiella pneumoniae во урината може да се случи и во болниците, бидејќи бактериите често се во катетерите, а инфекциите се почести кај жените заради краткиот мочен канал.
Klebsiella pneumoniae има форма на стапче со дебела полисахаридна капсула и пипци со кои може да се зафати за телесните ткива, а капсулата ја штити од нападите на човековиот имунолошки систем. Оваа бактерија природно живее во нашиот дигестивен систем, а инфекцијата се развива доколку бактериите од фецесот дојдат до мочниот канал. Пренесувањето се врши на неколку начини, како што е на пример бришењето во погрешен правец после извршената нужда, доаѓање во контакт со фецес, користење на заразен катетер во болница, полов однос без заштита, а се пренесува и од мајка на новороденче.
Симптомите на уринарната инфекција предизвикана од Klebsiella pneumoniae се типични за сите слични инфекции: покачена телесна температура, печење и болка при уринирање, болка во долниот дел од стомакот и крв во урината.
Покрај инфекции на уринарниот тракт, Klebsiella pneumoniae предизвикува и воспаленија на белите дробови, менингитис, инфекција на отворени рани, како и инфекции на системот за варење.
