Ново истражување врз глувци сугерира дека исхраната богата со леб и пченично брашно може да го поттикне зголемувањето на телесната тежина дури и без зголемен внес на калории.
Јапонските научници открија дека таков начин на исхрана може да ја забави потрошувачката на енергија и да го „пренасочи“телото кон складирање на масти. Ова го доведува во прашање општото мислење дека само вишокот калории, особено оној од масти, е одлучувачки за зголемување на телесната тежина.
Влијанието на лебот и јаглехидратите врз телесната тежина се дискутира долго време, но има помалку истражувања што детално испитуваат што се случува во метаболизмот, особено кога станува збор за пченично брашно.
Тим од Универзитетот Осака Метрополитен во Јапонија открил дека исхраната богата со пченичен леб ја намалува потрошувачката на енергија. Со други зборови, телото потоа полесно преминува во режим на складирање масти, дури и кога вкупниот внес на калории останува ист.
„Овие наоди укажуваат дека зголемувањето на телесната тежина можеби не е последица на некој специфичен ефект од пченицата, туку на претпочитање храна богата со јаглехидрати и метаболички промени што произлегуваат од тоа“, објасни нутриционистот Шигенобу Мацумура од Метрополитанскиот универзитет во Осака.
Што покажаа експериментите врз глувци?
Научниците спроведоа експерименти во кои лабораториските глувци можеа да изберат помеѓу нивната вообичаена храна и три дополнителни опции: обичен леб, печено пченично брашно или печено оризово брашно.
Тие ги следеле промените во телесната тежина и внесот на калории, а анализирале и примероци од крв и ткиво за да утврдат што се случува со хормоните, шеќерот, метаболитите и генската експресија во црниот дроб.
Се покажало дека глувците, особено мажјаците, почесто избирале храна богата со јаглехидрати, по што се здебелиле и акумулирале повеќе масно ткиво. Понатамошните анализи покажале дека овие промени не се должат на прејадување или помала физичка активност, туку на самиот состав на храната.
Исхраната богата со пченично брашно го намалила вкупниот внес на калории и ги активира гените поврзани со претворањето на јаглехидратите во масти. Кога глувците биле вратени на стандардна исхрана, зголемувањето на телесната тежина престанало, а метаболичките промени се обратиле.
Што значи тоа за луѓето?
Истражувачите истакнуваат дека овие резултати би можеле да помогнат во иднина да се пронајде подобра рамнотежа помеѓу вкусот и здравјето, без разлика дали преку совети за исхрана, едукација или развој на нови прехранбени производи.
Сепак, важно е да се нагласи дека студијата е спроведена на глувци, а не на луѓе. Иако постои можност слични процеси да се случуваат и кај луѓето, ова сè уште не е потврдено со дополнителни истражувања. Исто така, метаболичкиот одговор на храната е под влијание на многу други фактори, како што се возраста, хормоните и целокупната исхрана.
Поради оваа причина, научниците планираат да продолжат со истражувањата врз луѓето, како и подетално испитување на влијанието на различните видови јаглехидрати, интегралните и рафинираните житарки, храната богата со растителни влакна, комбинациите со протеини и масти, методите на подготовка на храната и времето на оброците.
