Праските се одличен извор на антиоксиданти, кои го штитат организмот од разни болести. Полни се со полифеноли, кои дејствуваат како прва помош при изгореници од сонце. Киселината од праските, според една студија, спроведена во 2014 година на Универзитетот Пулман во Вашингтон, го спречува развојот на ракот на дојката и дијабетес тип 2.
Чувари на кардиоваскуларното здравје
Антиоксидантите кои ги содржат праските го чуваат здравјето на срцето и крвните садови. Тие, исто така, содржат и железо, кое го стимулира производството на црвени крвни клетки, кои, пак, служат за проток на кислород од белите дробови до остатокот на телото. Бета каротенот го победува холестеролот, па така ги спречува и болестите на срцето.
Го штитат видот
Не само што се богати со бета каротен, туку содржат и големи количини на витамин А и Ц, кои го забрзуваат протокот на крвта и го спречуваат развојот на познатите болести на очите – катаракта и макуларна дегенерација. Исто така, големата содржина на зеаксантин го штити окото од лошото влијание на сончевите зраци.
Ја прават кожата убава
На вашата кожа и годат праските – витаминот А и овозможува на кожата да ја задржи влагата, со што ќе се задржи мазната текстура на кожата.
Го намалуваат крвниот притисок
Праските се богати со калиум кој го контролира крвниот притисок, ги намалува шансите за развој на бубрежни камења и ги зајакнува коските. Другите минерали во праските, како што се магнезиум, цинк и калциум помагаат во правилно функционирање на имунолошкиот и нервниот систем.
Позитивно делуваат на варењето
Една голема праска ќе ви овозможи да внесете три грама влакна, а, веројатно, веќе знаете дека влакната се важни за доброто функционирање на варењето. Повторно, влакната ќе дејствуваат позитивно и врз здравјето на кардиоваскуларниот систем одржувајќи го холестеролот под контрола.
