ПРАВА НА ПАЦИЕНТИ: Кога и колку се плаќа партиципација за здравствени услуги?

Согласно Законот за здравствено осигурување, осигурениците при користење здравствени услуги во јавните здравствени установи или приватни кои имаат договор за работа со Фондот за здравствено осигурување, плаќаат партиципација од 20 %, односно 50 % за протези и ортопедски помагала. Ослободени од плаќање лични средства се ослободени само одредена група на пациенти.

Согласно Законот за здравствено осигурување, осигурените лица учествуваат со лични средства (партиципација) во цената на здравствената услуга.

Плаќање на учество

  • Осигурените лица учествуваат со лични средства при користење на здравствени услуги и лекови, но најмногу до 20 % од просечниот износ на вкупните трошоци на здравствената услуга, односно лековите;
  • За здравствените услуги за кои е одобрено лекување во странство, осигуреното лице учествуваат со 20 % од вкупните трошоци;
  • Осигурените лица учествуваат до 50 % од утврдената цена на протезите, ортопедските и други помагала и санитетски средства изработени од стандарден материјал.

Ослободување од учество

Од учество согласно член 34 од Законот за здравствено осигурување се ослободуваат:

  • Осигурените лица за лекарски преглед кај избраниот лекар (општ, гинеколог, стоматолог) и итната медицинска помош на повик;
  • Децата со посебни потреби според прописите за социјална заштита;
  • Корисници на постојана парична помош, лицата сметени во установи за социјална заштита и во друго семејство според прописите за социјална заштита, освен за лековите од листата на лекови и за лекување во странство;
  • Осигурените лица кои во текот на една календарска година платиле учество во специјалистичко – консултативна и болничка здравствена заштита освен за лековите и лекување во странство, во износ повисок од 70 % од просечната остварена месечна плата во Македонија во претходната година.
  • Душевно болни лица сместени во психијатирски болници и ментално
    ретардирани лица без родителска грижа;
  • Осигурени лица кои доброволно дарувале крв, според програмата која се
    однесува на доброволното дарување на крв, донесена согласно со Законот за
    здравствената заштита;
  • Осигурени лица кои доброволно дарувале ткиво или орган;
  • Осигурените лица – корисници на правото за биомедицинско потпомогнато
    оплодување за здравствените услуги извршени во постапките на биомедицинско
    потпомогнато оплодување спроведени со автологно оплодување и алогенеичко
    оплодување за прво, второ, трето и четврто дете, најмногу до трет неуспешен
    обид за оплодување.

Ослободувањето од плаќање на партиципација според овој основ се добива со решение на подрачната служба на Фондот за здравствено осигурување со важење до крајот на календарската година или до 31 декември во тековната година. Правото на ослободување од учество во трошоци на здравствени услуги во специјалистичко – консултативна и болничката здравствена заштита се остварува со поднесување на барање на образец кон кој се приложуваат и следните документи:

  • Потврда за платен износ на партиципација во здравствената установа;
  • Отпусно писмо за болничко лекување;
  • Спецификација (пресметка за извршени здравствени услуги од здравствената установа;
  • Доказ за вкупните примања на осигуреникот и членовите на неговото семејство (примања од плати, пензии, вршење на дејност и сл.);
  • Извод од матична книга на родени за деца од 1-5 години (копија);
  • Лична карта на увид за осигурени лица постари од 65 години;
  • Здравствена легитимација на увид.