Стентовите се всушност мали метални цевчиња кои имаат мрежаста структура, служат во разбивање на стеснувањето на крвните садови и го зацврстуваат ѕидот на крвниот сад така овозможувајќи подобар проток на крвта низ крвниот сад.
Како се користат стентовите?
Доколку наодот на коронарографијата е таков да биле откриени значајни стеснувања кои се погодни за третирање со стент, интеревенцијата се продолжува и во крвните садови на срцето, се пласира помал катетар на кој се наоѓа нераширен балон со стент на него. Кога балонот со стентот се позиционира во делот каде се наоѓа стеснувањето на крвниот сад, балонот се дува на голем притисок и го втиснува стентот во ѕидот на крвниот сад. Притоа, се разбива стеснувањето, а стентот со својата структура обезбедува крвниот сад да не се запуши, но и да се намали можноста подоцна за создавање на повторно стеснување.
Какви видови постојат?
Постојат чисто метални стентови, но и такви кои на металната основа имаат лек кој се ослободува во одреден временски период, по вградување на стентот. Заедничко и на двата вида е да по вградувањето во крвниот сад, металната основа во него останува постојано. Постојат и нови стентови чија основа не е метална, што овозможува тој во тек на одреден временски период во целост да се разгради и да исчезне.
Одлуката за тоа каков стент ќе се вгради кај пациентот, зависи од распространетоста и тежината на стеснување на крвните садови, а индикацијата ја поставува лекарот кој ја врши интервенцијата.
