Скијањето не е само спорт, скијањето е здравје!

Дали знаете зошто е добро скијањето?! Или можеби размислувате дали годинава да заминете некаде на скијање?! Прочитајте го текстот во продолжение и со гаранција ќе сакате да отпатувате веднаш....

За многумина првите снегулки се знак дека е време за топла облека, ќебенце и хибернација… За други, пак, дека е време да ги извадат скиите и да уживаат во својот омилен спорт. Скијањето е одлично затоа што е комбинација од физичка активност и престој во природа, но и изложеност на сонце, кое толку ни недостастува во текот на зимата.

Ги зајакнува коските и зглобовите

Додека скијаме колената мора да ја поддржуваат тежината на телото и да ја издржат тензијата која се создава додека се спуштаме по падините. На тој начин тие стануваат посилни и поцврсти. Исто така, и нашите коски мора да го издржат тој напор, па следствено на тоа стануваат посилни и поцврсти. Посилни коски и зглобови значат и помала можност од оштетувања или болести како што е остеопорозата во староста.

Зголемување на флексибилноста

Со зацрвстување на коските и мускулите се развива флексибилноста. И не само тоа туку се одбегнуваат сите идни истегнувања или сериозни повреди на мускулите. Добро истегнување пред секое скијање ќе помогне да се зацврстат и абдоменот и колковите.

Кардио тренинг без дилема

Просечна личност од седумдесетина килограми за половина час скијање троши околу 220 калории, што е солидна бројка. Ако се земе предвид дека тој половина час поминува и во одлично расположение, скијањето навистина се наметува како одличен зимски кардио тренинг. Кога на сето тоа уште ќе се додаде и свежиот воздух комбиниран со физичка активност, јасно е колку всушност скијањето е здраво за срцето и белите дробови.

Ги зајакнува мускулите на долниот дел од телото

Додека трае скијањето телото е во „чучната“ положба, па не е ни чудно што ги зајакнува мускулите на долниот дел од телото како квадрицепсите, глутеусите и бутовите. Работата на тие мускули во теретана е често тешка и напорна, но додека се скија, во природа и во добро друштво, карактеристичното печење и затегнување не се ни чувствува. Резултатите ќе бидат видливи.

 

Фантастичен антидепресив

Скијањето, како и останатите спортови, го поттикнува мозокот да ослободува хемикалии како што се ендорфинот, адреналинот и серотонинот, кои делуваат како антидепресиви и го подобруваат расположението. Не само тоа, туку и самиот престој на сонце го подобрува производството на витамин Д во телото, кој, исто така, делува како природен антидепресив. Скијањето е друштвен спорт, а опкруженоста со луѓе, особено со оние кои ги сакаме, како семејството или пријателите, докажано го подобрува нашето расположение и добро влијае на нашето ментално здравје.

Длабок сон

Скијањето знае да биде прилично исцрпувачко. Па после напорен и исцрпувачки ден следува длабок сон. Дефинитивно доколку заминете на скијање ќе се наспиете онака како што сакате со месеци. Па има ли нешто подобро од тоа?

Подобра проприоцепција

Проприоцепција е вид на чувство кое се однесува на положбата на телото и неговите делови. Накусо, тоа е свесност за себеси. Во скијањето исклучително се важни рамнотежата и координацијата, заради тоа постојано мораме да сме свесни за својата положба и секое, па и најмало движење. Затоа скијањето е одлично за подобрување на проприоцепцијата, која ослабува со стареењето.