Носењето мокар костим за капење може да предизвика од габични инфекции до воспаленија на бешиката. Познато е дека габите и бактериите се развиваат на влажни и темни подрачја како што се токму костимите за капење или облеката за вежбање. Жените со намален имунитет кои имаат дијабетес или земаат одредени лекови и подолго носат мокри костими за капење попрво ќе добијат инфекција.
Ова се причините зошто никогаш не би требало предолго да останете во мокар костим за капење:
Одлична комбинација за бактерии
Внатрешноста на костимот за капење е влажна и топла, па создава идеално подрачје за создавање бактерии. Материјалите на костимите впиваат разни хемикалии и бактерии кои се наоѓаа во базените или морињата и езерата. По излегувањето од вода вашиот полов орган е во контакт со сите штетни материи кои се задржуваат на костимот. Тоа го нарушува балансот на добрите бактерии во вагината и може да доведе до, на пример, вагинитис и воспаление на уринарните патишта.
Симптомите кои укажуваат на проблем: Промени кај вагината како што се непријатен мирис, сивкаста боја, чешање, оток и чувствителност укажуваат на бактериски вагинитис. Симптомите на воспаление на уринарните патишта вклучуваат и силна и постојана потреба за мокрење, чувство на печење и жарење при мокрењето, болка во карлицата и заматена урина.
Причина за габични инфекции
Со оглед на тоа дека габите успеваат на топли и влажни подрачја, мокрите костими за капење можат да предизвикаат габични инфекции кај жените. Според University Hospitals, размножувањето на бактерии во мокрите костими предизвикува пораст на габи во вагината или вулвата, што предизвикува непријатни симптоми како печење и жарење, чувствителност и густ секрет.
Симптомите кои укажуваат на проблем: Силно чешање во внатрешниот или надворешниот дел на вагината и бел густ исцедок.
Осип и чешање
Седењето во мокар костим може да предизвика инфекција слична на атлетско стапало, ширејќи им го патот на габите кои освен гениталиите можат да го зафатат и внатрешниот дел на задникот. Инфекцијата е мошне слична на габичната, но разликата е во обликот на габите.
Симптомите кои укажуваат на проблем: Чешање и осип околу вагината и задникот и пукнатина во делот на гениталиите, црвенило и излупена кожа каде што осипот е најцрвен во средината.
Кај сите состојби се советува посета на гинеколог за со брис да се утврди за која инфекција станува збор и да се даде соодветна терапија.
