Шеќерната болест е едно од најмасовните страдања на современиот човек, која лесно се дијагностицира и со правилна едукација одлично се превенира и се контролира. Овој прирачник, пред сé, е наменет за лицата со дијабетес и нивните најблиски, како и на стручните медицински лица кои се занимаваат со нивната едукација. Книгата ја препорачуваме и за студентите, како и за лекарите кои започнуваат да се занимаваат со дијабетес, за полесно стекнување на практични сознанија.
Шеќерната болест или Дијабетес мелитус (Diabetes mellitus) претставува хронична, или, би рекле, уште и доживотна болест, што се одликува со нарушување, пред сѐ, на метаболизмот на јаглехидратите, но и на мастите и протеините и со специфични
промени на крвните садови.
Коронарна болест
Заболувањето на крвните садови на срцето е честа болест, а особено кај болните со дијабетес тип 2. Тегобите се јавуваат доцна и најчесто се манифестираат како:
1. Замор при физички напор;
2. Болка во пределот на градите, градната коска или во стомакот при напор, возбуда, студен воздух или престој во зачадени простории или во простории каде што има многу луѓе;
3. Промени во пулсот или аритмии.
При секоја ваква тегоба треба да знаете дека е можно да се развие инфаркт, чиј крај не може да се предвиди. Затоа веднаш треба да се јавите на лекар и да се направи ЕКГ.
За да се избегнат овие сериозни последици, треба да внимавате на следниве правила:
1. Гликемиите да бидат идеални;
2. Веднаш да престанете да пушите;
3. Да го лекувате и да го нормализирате крвниот притисок;
4. Да ослабeте т.е. да ја нормализирате телесната тежина;
5. Да се движите;
6. Да ги нормализирате агресивно и трајно покачените крвни масти.
Мозочни крвавења
Мозокот многу често страда кај дијабетесот. Можеби и почесто од другите витални органи. Ризикот од мозочните крвавења расте со возраста. Најчести се крвавења во разни предели на мозокот, што оставаат трајни и многу тешки последици, почнувајќи од одземеност на едната страна на телото, нарушување во говорот и смрт.
Основно во спречувањето на промените во мозокот се:
1. Нормализирање на крвниот шеќер;
2. Нормализирање на покачениот крвен притисок;
3. Нормализирање на мастите во крвта.
(продолжува)
