Што да правите и како да се однесувате ако сте го прележале новиот коронавирус? Дали сега сте заштитени, пд што треба да се пазите – се само некои од прашањата кои ги мачат лицата кои се опоравиле од КОВИД-19.
Дали рековалесцентите (лица кои заздравуваат по прележана болест) треба да носат маски?
Носењето маска во затворен простор, но и на отворено во одредени ситуации каде не може да се држи физичко растојание и да се спроведат мерките на превенција од вирусот, во земјава е задолжително за сите граѓани, без оглед дали прележале или не коронавирус.
Епидемиолозите потсетуваат дека и оние кои се излекувале од КОВИД-19, во првите недели по опоравување треба да носат маски, за да веќе ослабениот организам не го изложуваат на други опасности.
Колку пати може да донираат крвна плаза, излекуваните од новиот коронавирус?
Во земјава, донатори на крвна плазма може да бидат сите излекувани лица од коронавирус на возраст помеѓу 18 и 60 години, и ако имаат над 60 килограми. Неопходно е два пати да бидат тестирани и да имаат два негативни теста. По 21 ден од вториот негативен тест може да донираат крвна плазма. Процесот на донирање трае од 40 до 60 минути, а повторно може да донираат плазма по 15 дена, но сепак се зависи од количината на антитела во организмот.
Колку долго лицата излекувани од КОВИД-19 може да бидат преносители на вирусот?
Кога ќе се инфицирате со коронавирус, просечниот период на инкубација е пет до шест дена, максимално 14. Сепак, се покажало дека болеста може да трае и подолго, односно одредени пациенти биле заразни и до четири недели. Тоа, велат стручњаците, зависи од количината на вирусот во телото или може да бидат во прашање остатоци од вирусот кои даваат позитивен резултат.
На што треба да внимаваат опоравените пациенти?
Пациентите кои оздравеле од КОВИД-19 или се во процес на оздравување, треба да се пазат од други вируси и бактерии. Особено оние пациенти кои минале низ болничко лекување, потеницраат епидемиолозите. Потребно е и по опоравувањето да одмораат, доволно да спијат, правилно да се храната и да се придржуваат до сите мерки на заштита – носење маска, хигиена на рацете и физичка дистанца.
