5 симптоми кои покажуваат дека имате чувствителни црева

По консумирање одредена храна, панталоните почнуваат да ве стегаат? Ви се чини дека стомакот ви расте како денот одминува? Не сте единствени.

Надуеноста на стомакот се дефинира како појава на голема количина на гасови во цревата. Стомакот може да биде тврд на допир, а може да се јават и грчеви.

Еве што се може да ја предизвика оваа непријатна состојба и како можете да си помогнете.

  • Јадете на брзина

Ако истрчате од дома со банана во рака, а потоа набрзина изедете сендвич за ручек на вашето биро во канцеларија, голема е веројатноста дека со оваа храна ќе проголтате многу воздух. И наместо да влезе во белите дробови, дел од тој воздух оди во желудникот, па во тенкото и дебелото црево, а потоа предизвикува надуеност. Затоа, најдобро би било да одвоите доволно време за да можете мирно да седнете и да го изедете секој оброк. Обидете се да забавите и џвакате го секој залак 20 до 40 пати.

  • Стрес

Ако сте под стрес или вознемирени, ова може да предизвика вашето тело да реагира и да доведе до промени во чувствителноста на цревата. Ова може да предизвика грчеви во мускулите на желудникот, цревата или дебелото црево, што доведува до стомачни грчеви, болка и непријатност. Симптомите треба да исчезнат кога нивото на стрес ќе се намали. Пробајте медитација, техники на дишење, но и билни чаеви кои можат да ви помогнат во тоа.

  • Премногу сол

На нашето тело му треба сол, но повеќето од нас претеруваат со внесот. Кога чувствувате дека стомакот ви е надуен или затегнат, ова е еден од најчестите краткорочни ефекти од неговото прекумерно внесување. Солта може да доведе до задржување на вода, а со тоа и надуеност. Треба да се има предвид дека солта се крие во разните секојдневни намирници, како лебот, но и во бисквитите, брзата храна, супите од кесичка и слично.

  • Газирани пијалаци

Овој вид на пијалаци содржат јаглерод диоксид, а овој гас може да ви го надуе стомакот и да предизвика грчеви. Проблемот дополнително го влошуваат вештачките засладувачи, кои често ги има во диеталните варијанти на ваквите пијалоци, бидејќи на многу луѓе им е тешко да ги сварат. Обичната вода е најдобриот избор на пијалок, црните и зелените чаеви се добри за варење, додека чајот од нане може да помогне при надуеност. Ако не ви се пие само вода, слободно додадете парче лимон. Ова ќе го поттикне разложувањето на храната и ќе ги ублажи дигестивните проблеми.

  • Нетолеранција на лактоза

Можеби после чаша млеко или сладолед се чувствувате надуено? Најчестите симптоми на нетолеранција на лактоза се:

  • Грчеви во стомакот
  • Дијареа
  • Надуеност
  • Повраќање
  • Мачина

Некои луѓе го немаат ензимот потребен за разградување на лактозата, шеќер кој се наоѓа во кравјото млеко. Како резултат на тоа, лактозата ферментира во дебелото црево, произведувајќи големи количини на јаглерод диоксид и водород, што може да предизвика надуеност и грчеви во стомакот. Обидете се да ги исфрлите млечните производи од вашата исхрана најмалку една недела за да видите дали проблемот ќе исчезне.