АЛЕРГИСКА РЕАКЦИЈА: Важно е да препознаете кој инсект ве каснал поради можни последици по здравјето

Доколку се јават знаци на алергиска реакција во форма на осип и црвенило по целото тело, проследени со вртоглавица, мачнина и главоболка потребна е итна лекарска помош.

Иако изгледаат безопасно, мравките може да предизвикаат алергиска реакција како кај возрасните, така и кај децата. Стршленот, пчелата, осата, но и бубашвабата се инсекти кои што кај лицата со алергии може да предизвикаат проблеми.

Доколку се јават знаци на алергиска реакција во форма на осип и црвенило по целото тело, проследени со вртоглавица, мачнина и главоболка потребна е итна лекарска помош.

СТРШЛЕН

Се нарекува “оса на стероиди“ поради големината, која е двојно поголема во однос на обичната оса. Нивниот отров е помалку токисчен од отровите на останатите оси, но содржи повеќе ацетилколин, состојка која предизвикува силно чувство на печење. Но, треба да се знае дека стршлените не бодат толку често колку останатите оси. Но, убодот за лицата кои се алергични, може да биде фатален, особено ако стршленот направил убод на лицето, вратот или јазикот.

КОМАРЦИ

Комарците за повеќето луѓе се досадна работа, поради која затвораат прозорци и се мачкаат со специјални средства. Убод од комарец обично создава благо црвенило и јадеж кој трае и до неколку дена, но во ретки случаи може да дојде и до силна алергиска реакција која резултира со отекување на грлото, исип и тешко дишење.

БУБАШВАБИ

Освен што се проблем во некои домови каде ги има, бубашвабите исто така може да предизвикаат и алергиска реакција. Каде што поминуваат, бубашвабите оставаат траги на плунка, фекалии и остатоци од делови од телото, што кај оние лица кои се чувствителни, може да предизвика алергиска реакција, особено кај децата.

МРАВКИ

Различни мравки гризат на различни начини. Реакцијата на угризот зависи од лицето, видот на мравката и бројот на гризнувања. Во најлош случај, мравките кај лица кои се алергични на оса или пчела, ќе предизвикаат алергиска реакција во форма на мачнина, пролив, тешко дишење, отекување на грлото или јазикот и слично. Поради тоа, добро е секогаш при гризнување од мравки, да ве прегледа лекар. Во повеќето случаи угризите од мравки не се опасни и предизвикуваат црвенило и отекување на кожата околу гризнатото место, како и мала болка која исчезнува по неколку часа.

ПЧЕЛИ ИЛИ ОСИ

Убодите од пчели или оси се чести во текот на летниот период, но ги има и во текот на пролетта. На луѓето ги “лепат“ слатките мириси како сладолед, овошје и слатки напитоци, а често знаат да направат убод и ако се заплеткаат во коса или облека.

Реакцијата на убодот може да биде блага, во форма на благо црвенило на местото на убодот, но и потешка – алергиска реакција. Лицата кои се алергични на отровот на пчелата или осата, мора да бидат внимателни и затоа никогаш за време на летниот период не треба да користат силни парфеми, да носат облека во впечатливи и силни бои и да пијат слатки напитоци на плажа. Ако се јават знаци на алергиска реакција во форма на исип и црвенило по целото тело, проследено со вртоглавица, мачнина и главоболка, потребна е итна стручна помош.