Бесот го зголемува ризикот од инфаркт

Се смета дека потиснувањето на емоциите му штети на мозокот и на телото, но едно ново истражување укажува дека ниту експлозивното искажување на бесот не е добро, бидејќи во наредните два часа значително го зголемува ризикот од срцев удар во однос на вообичаената состојба.

Во проучувањето и следењето на преку 4 000 пациенти кои доживеале срцев напад, а кое траело седум години, се утврдило дека испитаниците кои во текот на претходната година доживувале изливи на бес имале повеќе од двојна шанса да доживеат срцев удар во рок од два часа од таа епизода, во споредба со останатите периоди во текот на годината.

„Постои привремено зголемен ризик од срцев напад по излив на гнев“, тврди авторката на ова проучување Елизабета Московски од Истражувачкото одделение за кардиоваскуларна епидемиологија на медицинскиот факултет Харвард.

И тоа колку е поголем бесот – вклучувајќи и фрлање предмети и закани кон другите – толку е поголем ризикот, објавија истражувачите во списанието American Journal of Cardiology. Истражувајќи ја позадината на срцевите напади кои ги доживеале испитаниците, истражувачите утврдиле дека со секое зголемување на интензитетот на гнев, ризикот од срцев удар во наредните два часа растел.

Најголем ризик се појавил по реакција која пациентите ја опишувале како „побеснетост, губење на контрола, фрлање предмети, повредување себеси и другите“. Најчестите причини кои влијаеле на разбеснетост кај испитаниците биле семејни работи, конфликт на работа, проблеми со превозот.

Иако ова истражување не може да докаже дали изливите на гнев водат кон срцев напад, според размислувањата на некои кардиолози кои не учествувале во истражувањето, резултатите и заклучокот од оваа студија имаат смисла. Лутината е емоција која ослободува епинефрин и норепинефрин, а тие хормони го зголемуваат крвниот притисок, пулсот, ги стеснуваат крвните садови и ги прават белите крвни зрнца лепливи, со што се зголемува ризикот од крвни згрутчувања, па научниците сметаат дека тоа било еден од начините на кои изливите на бес може да доведат до инфаркт.