Гинеколошки преглед еднаш годишно треба да биде императив за сите жени, но последното истражување покажува дека една третина од анкетираните жени го одбегнуваат или одложуваат одењето на гинеколог од причини кои навистина немаат суштинско значење.
Истражувањето на британското добротворно Здружение „Jo’s Cervical Cancer Trust“ во кое учествувале 2 017 жени ги открива најчестите причини за избегнување или одложувањето на посетата на гинеколог.
Дури една третина од испитаните жени одговориле дека нема да одат на ПАП тест ако не им е депилирана интимната зона. Чувството на непријатност поради изгледот на сопственото тело е уште една причина за непосетување на гинеколог (35 проценти), исто како што е и изгледот на вулвата и мирисот на вагината
Од Здружението предупредуваат дека редовниот годишен ПАП- тест би требало да биде императив за секоја жена, бидејќи преку него може да се детектира абнормалност на клетките кои можат да предизвикаат рак на грлото на матката. Ако болеста е откриена навреме, шансите за оздравување се значително поголеми.
Ракот на грлото на матката е најчестиот рак кај жените на возраст под 35 години. Затоа „Jo’s Cervical Cancer Trust“ започна кампања #SmearforSmear кампања, во која жените на Инстаграм под зададениот хаштаг објавуваат селфи со размачкан кармин, со цел да се подигне свеста за посета на гинеколог и редовно правење на ПАП тест.
