ЧЕСТО СЕ БУДИТЕ НАВЕЧЕР? Постојат неколку причини зошто, но проверете и кога ви треба лекарска помош

Дали е нормално постојано да се будите во текот на ноќта?

Можеби мислите дека квалитетен сон е оној сон кога ќе спуштите глава на перница и не се будите до наутро. Но, сепак многумина се будат и неколку пати во текот на ноќта, бидејќи циклусите на сонот кај секого се различни. Поголем дел од времето нема ниту да ги забележите тие кратки моменти, но ако имате проблем и не можете повторно да заспиете откако веќе сте се разбудиле, се може да изгледа како голема фрустрација, а понекогаш може да биде и причина за загриженост.

ШТО ТОА ВЕ БУДИ СЕКОЈ ПАТ?

Постојат вообичаени причини зошто се будиме во текот на ноќта, а тие вклучуваат:

Жешко ви е. Идеалната температура во собата каде што спиете треба да биде околу 18 степени. Ако често се потите навечер, можеби и поради менопауза, користете проѕирна постелнина, по можност повеќеслојна за да можете да ја отстраните едната ако ви биде топло. Може да вклучите и вентилатор.

Мора да одите во тоалет. Будењето затоа што мора да уринирате се нарекува ноктурија, а тоа е резултат на консумирање премногу течност пред спиење. Може да биде последица и на проблеми со мочниот меур. Сепак, прво обидете се да прескокнете внесување течности пред спиење, а ако тоа не помогне, консултирајте се со лекар.

‘Рчите. Звукот не е секогаш проблемот, но понекогаш може да значи дека се работи за апнеа во сон, состојба во која лицето одново престанува да дише за време на спиењето. Апнеата може да ве разбуди, но е поврзана и со одредени здравствени состојби, како што е висок крвен притисок.

Пиете премногу алкохол. Една или две чаши од омилено вино често ни служат како средство за релаксација пред спиење, но алкохолот може да си поигра со вашиот сон. Тоа понекогаш може да помогне полесно да заспиете, но почесто ќе биде причина зошто се будите во текот на ноќта или се будите рано наутро. Алкохолот исто така ќе го намали времетраењето на РЕМ фазата. Покрај тоа, почесто ќе треба да одите во тоалет во текот на ноќта. Колку повеќе пиете, толку полоши се последиците врз сонот. Најпаметно би било да го ограничите внесот на алкохол пред спиење, а ако сепак сакате, тогаш нека биде една чаша, еден час пред спиење.

Анксиозни сте и депресивни. Анксиозноста и депресијата можат да си поиграат со квалитетот на сонот, а лошиот сон може само да ги влоши проблемите со менталното здравје. Ако ве мачат токму овие проблеми, најдобро е да се обратите кај стручно лице за да може да ви се обезбеди соодветна помош.

Нешто ве боли. Околу 2/3 од луѓето кои страдаат од хронична болка, како што се болки во грбот или некои последици од сериозни терапии, често се борат и со лош сон. Ако не можете да спиете поради силна болка, вашиот лекар може да ви помогне со лекови и дополнителни испитувања.

Ве мачи гастритис. Рефлукс, глад, премногу храна може да бидат причините поради кои се будите во текот на ноќта. Посетете лекар ако имате гастроентеролошки проблеми.

Доколку во кревет се вртите и 20 минути откако сте легнале, стручњаците советуваат да станете и да ја напуштите собата. Одете во друга просторија и медитирајте или читајте книга. Вратете се кога ќе почувствувате многу поспано.

КОГА ДА СЕ ПОСЕТИ ЛЕКАР?

Ако ви е тешко да возите автомобил, имате помалку енергија и ви е тешко да се концентрирате на работа, или имате проблеми со меморијата – посетете лекар кој ќе процени дали се работи за здравствен проблем.