ЧЕСТО СЕ БУДИТЕ СО ГЛАВОБОЛКА? Ова се 10 можни причини за болка

Уште не сте ги отвориле очите, а главоболката е веќе тука? Ако ова ви се случува често, не сте сами.

“Утринските главоболки се вообичаени, ако ретко се појавуваат, немате причина да се грижите, но ако се појавуваат речиси секое утро без посебна причина, сигурно се прашувате зошто“, вели д-р Насима Шадбер, невролог.

Што предизвикува појава на утринска главоболка?

Без разлика дали се работи за мигрена, тензиска главоболка или некоја друга, еве 10 причини зошто до неа доаѓа.

ВЕ МАЧИ НЕСОНИЦА

Постои поврзаност помеѓу сонот и главоболката, па неквалитетниот сон може да предизвика главоболка, но штом квалитетот на сонот се подобри, главоболките можат да исчезнат, објаснува д-р Шадбер.

СТРАДАТЕ ОД АПНЕА ВО СОН

Опструктивната ноќна апнеа е многу поопасна состојба за здравјето од ‘рчењето. Луѓето со опструктивна ноќна апнеа се склони кон развој на агресивна форма на атеросклероза која ги става на ризик од нарушен проток на крв и кардиоваскуларни проблеми, а доколку не се лекува може да доведе до фатални последици. Луѓето со опструктивна слип апнеа всушност престануваат да дишат до 400 пати во текот на ноќта. Овие паузи траат од 10 до 30 секунди, по што следи ‘рчење, односно дишењето повторно започнува. Зошто влијае на појавата на главоболки? Недостатокот на кислород што се јавува може да доведе до зголемен притисок, што ќе доведе до главоболки.

ИМАТЕ НАПАД НА МИГРЕНА

Мигрената се дефинира како напад на еднострана, пулсирачка главоболка, со умерен до силен интензитет, која трае од 4 до 72 часа, придружена со гадење и/или чувствителност на светлина и звук. Мигрената може да се појави во секое време, но се чини дека повеќето луѓе ја развиваат во текот на ноќта, а една студија покажала дека таа се јавува во циклус, што значи дека секогаш ќе се појави во слично време. Ова може да значи дека таа се појавила во текот на спиењето и дека сте се разбудиле со силна главоболка. Еден од начините за спречување на мигрената е и ставањето акцент на водењето дневник за главоболка, во кој пациентот ќе ги евидентира и идентификува неговите лични ризици кои можат да предизвикаат напад на мигрена.

КОФЕИНСКА АПСТИНЕНЦИЈА

Со оглед дека кофеинот може да влијае на протокот на крв во мозокот, а ако не сте испиле доволно кафе еден ден, може да дојде до кофеинска апстиненција и невролошки несакани ефекти, што е слично на одвикнување од други опијати. Бидејќи повеќето луѓе пијат кафе наутро, главоболката како последица може да се појави веднаш по будењето. За да ја надминете оваа состојба, потрудете се да не консумирате кофеин попладне, а во меѓувреме не престанувајте наеднаш да пиете кафе, туку полека заменете го со безкофеинско.

МОЖЕБИ “ШКРИПИТЕ“ СО ЗАБИТЕ ВО СОН

Стискањето на забите може да предизвика напнатост во зглобовите кои ја врзуваат вилицата, а оваа напнатост може да се претвори во главоболка, но може да почувствувате и болка во вилицата. Ако мислите дека овој проблем е одговорен за вашите главоболки, контактирајте го вашиот лекар за да ви предложи решение.

СТЕ ПИЕЛЕ АЛКОХОЛ ПРЕД СПИЕЊЕ

Без разлика дали сте испиле чаша вино по вечерата или попладне, можете да се разбудите со главоболка. Причината лежи во фактот што алкохолот влијае на неколку трансмитери во мозокот кои се поврзани со главоболката. Џенифер Видер, експерт за женско здравје, наведува дека алкохолот е и диуретик, што значи дека може да доведе до дехидрација, која е поврзана и со главоболки.

НЕСАКАНИ ЕФЕКТИ ОД ЛЕК

Понекогаш за главоболката можат да бидат одговорни и лековите. Ако мислите дека проблемот е во хормонските таблети, можете да ја промените терапијата кај вашиот лекар.

АНКСИОНОСТ И ДЕПРЕСИЈА

Лицата кои страдаат од депресија и анксиозност се склони кон главоболки, особено тензиски, но и мигрена. Лицата кои страдаат од мигрена често ќе искусат и посилен замор, што може негативно да влијае на секојдневниот живот. Ако мислите дека ова е ваш проблем, побарајте стручна помош.

СТЕ ИЗЕЛЕ НЕШТО ШТО НЕ ВИ ОДГОВАРА

Ако страдате од алергии или сте чувствителни на храна, токму тие можат да бидат тригери за главоболки, се наведува во една студија објавена во списанието Journal of Headache and Pain. Причината за појава на главоболка може да биде воспаление кое се јавува откако ќе изедете намирница која не ви одговара.

ПОНЕКОГАШ ПРИЧИНАТА МОЖЕ ДА БИДЕ СЕРИОЗНА

Лекарите велат дека кога некој ќе им се обрати поради чести утрински главоболки, мора да бидат претпазливи бидејќи постои и мала шанса тоа да биде сериозна причина, како што е тумор или израсток. Лицата кои имаат тумор на мозокот често се будат со силни главоболки, а тоа се случува особено често кога туморот расте. Иако ова не е честа причина, сепак треба да се провери.