Според пулмологот д-р Огнен Гајиќ кој работи во една од најпознатите болници во САД, Мајо клиниката нема податоци дека новиот коронавирус е ослабен во однос на пролетта, како што одредени научници изјавуваат во јавноста.
“Последниве месеци побројни се пациенти на помлада возраст со подобар имунитет и без коморбидитети, па можеби и тоа е причината. Исто така, во летните месеци луѓето се надвор, па и количината на вирус на која сме изложени е помала“, вели д-р Гајиќ.
Тој смета дека нема потреба од страв од потешки последици од тоа што наесен и во зима истовремено ќе бидеме изложени и на новиот коронавирусот и на грипот.
“За грипот имаме многу ефикасна вакцина, така што во средините каде вакцинацијата добро се спроведува, тоа нема да биде проблем. Коронавирусот може да биде поголем проблем, луѓето повеќе време ќе поминуваат во затворен простор. Секако, со добра вентилација, миење раце, задолжителни маски во затворен простор и со физичка дистанца, пренесувањето или ширењето на вирусот може многу добро да се контролира“, смета познатиот пулмолог.
Тој вели дека сите се надеваат дека вакцината наскоро ќе биде достапна и ефикасна, и дека тоа е можеби можно и до зима.
“Со вакцина, епидемиолошки мерки и развој на природен имунитет кај лицата кои го прележале коронавирусот, очекуваме дека пандемијата ќе биде запрена 2021 година“, вели д-р Гајиќ.
