Пишуваат:
доц. д-р Катарина Ставриќ, имунолог – педијатар и
д-р сци. Александар Сајковски, педијатар

 

Правилото е едноставно: колку почесто се дои толку повеќе млеко се создава, со што комплетно се задоволуваат потребите на бебето. Но дали и кога е потребно мајката да измолзува млеко од градата, како се изведува измолзувањето и кој е правилниот начин за чување на измолзеното млеко? Кои се потребите за млеко на бебето и како мајката да обезбеди доволно млеко за своето најмило?

 

ИЗМОЛЗУВАЊЕ НА МЛЕКО ОД ГРАДАТА
  1. Измолзувањето е најпотребно во првите недели заради подобро воспоставување на доењето. Со него може да се почне уште првиот ден, и тоа што почесто, за да се стимулира градата да создава повеќе млеко.
  2. Во случај на болест или ниска родилна тежина кај бебето, мајката треба да се измолзува, а млекото да му се дава на бебето преку сонда или лажичка, се додека не биде во состојба да цица.
  3. Ако мајката почуствува дека се намалува млекото и бебето почесто цица, а е гладно, во период од неколку дена треба поинтензивно да се измолзува меѓу подоите, со што ќе ја стимулира градата повеќе да создава млеко.
  4. Во случај на набрекнати гради кај мајката, измолзувањето ќе и помогне во растоварување на симптомите, а воедно и ќе го олесни цицањето на бебето.
  5. Ако мајката оди на работа, тогаш треба да се измолзува пред да оди на работа. Млекото да се остави во ладилник и да послужи за исхрана на бебето во периодот кога мајката е на работа. Мајчиното млеко може да стои во ладилник 48 часа. Истовремено, и во времето кога таа е на работа потребно е измолзување на секои 3 часа со што ќе се зачува секрецијата на млекото.
  6. Пред измолзување мајката треба да се смести удобно и да се опушти. Масажа на градите со топли облоги пред измолзување ќе помогне за полесен проток на млекото низ каналите.

    Процесот на измолзување трае 8-10 минути на секоја града. Количеството на млеко што се измолзува зависи од многу фактори: време изминато од претходниот подој, честотата на измолзувањето, како е совладана техниката на измолзување, периодот на денот кога се измолзува
  7. Измолзувањето се прави рачно или со специјални пумпи, кои механички врз принцип на вакуум го извлекуваат млекото од градата. Притоа, млекото се собира во стаклено шише кое претходно е термички обработено со што максимално се намалува ризикот од загадување со бактерии. Мајката ги мие рацете.
  8. При измолзување палецот и показалецот се поставуваат над ареолата на брадавката и се притиска. Со другите прсти се подржува градата. Притоа се притиска од сите страни за да се истисне млекото од сите делови на градата. Потребен е лесен притисок на градата долж каналчињата, почнувајќи од базата на градата кон ареолата. Така измолзувањето не би требало да боли. Доколку се активира окситоцинскиот рефлекс млекото потекува во млаз. Овој процес на измолзување трае 8-10 минути на секоја града. Количеството на млеко што се измолзува зависи од многу фактори: време изминато од претходниот подој, честотата на измолзувањето, како е совладана техниката на измолзување, периодот на денот кога се измолзува. Имајте на ум дека при цицање бебето извлекува повеќе млеко отколку што може да се измолзи.
  9. Млекото што се измолзува треба да се стави во ладилник во стаклено шише или чаша и во рок од 24 часа до максимум 8 дена да се искористи. Ако се замрзне може да се чува 3-4 месеци. Одмрзнувањето треба да е постепено, со ставање во садови со вода која постепено се загрева се додека млекото не се одмрзне. Пред употреба лесно се промешува. Не треба да се одмрзнува нагло под топла вода или во микробранова печка. По одмрзнувањето млекото треба да се употреби во рок од 1 час.
ПОТРЕБИ ЗА МЛЕКО НА БЕБЕТО

Производството на млеко во градата директно е условено од потребите на детето. Колку почесто се дои толку повеќе млеко се создава, со што комплетно се задоволуваат потребите на бебето. Одбегнувајте додавање на шише или цуцла лажалка во првите 3-4 недели додека не се воспостави доењето. Ако бебето не се дои редовно, градата ќе произведува помалку млеко.

Практични совети за обезбедување на доволно млеко:
  • Одмор на мајката во текот на денот. Секој одмор на бебето и мајката треба да го користи за свој одмор.
  • Измолзувајте ги градите во периодите меѓу подоите.
  • Исполнетост на градите пред подој. Во текот на првите недели пред подојот градите се набрекнати и полни со млеко. По подојот тие стануваат меки. Подоцна градите спонтано самите воспоставуваат регулација, така што тоа чувство на напнатост, како и на мекост исчезнува.
  • Одбегнување на шише или цуцла. За да му се овозможи на телото да го усогласи создавањето на млекото со потребите на бебето, потребно е да се одбегнува исхрана со шише во првите 4-6 недели, додека не се воспостави доењето.
  • Следење на подоите. Бебе кое често цица или не е сито по подоите треба да се следи, најдобро со мерење на тежината. Се додека тоа напредува во тежина, мајката има доволно млеко. Во периодот кога бебето ќе почне да спие подолго во текот на ноќта, тогаш во текот на денот може да бара почесто да цица. Доколку мајката смета дека сепак детето е недохрането потребно е да се консултира со педијатар.
  • Пиење многу течности за време на подоите. На тој начин се одржува задоволително количество на вода во телото и мајката создава доволно количество млеко.
  • Витамински внес. За време на доењето, мајката треба да ги задоволува дневните потреби од витамини било преку исхраната (зеленчук, спанаќ, квасец) или преку витамински препарати.
  • Здрава исхрана, која ќе помогне мајката да се чуствува добро и пријатно, со што се создава повеќе млеко.