Експерти од Германската фондација за срце велат дека без страв може да испиете најмалку четири шолји кафе дневно, дури и ако страдате од висок крвен притисок. Тие истакнуваат дека нема научни докази дека кофеинот е лош за хипертензијата.
Кафето може кусо да го покачи крвниот притисок бидејќи кофеинот го стимулира кардиоваскуларниот систем и го забрзува срцевиот ритам, но тоа главно се случува ако не сте навикнати на коефин.
Зголемувањето на крвниот притисок е помало кај лицата кои редовно пијат кафе. Овој ефект се јавува по редовно пиење кафе една до две недели, се вели во објавата на Германската фондација за срце. Во соопштението се наведува дека ова се однесува и за зелениот и црниот чај, со оглед на тоа што и тие се стимуланси.
Меѓутоа, треба да се обидете да се ограничите на пиење максимум 400 милиграми кофеин дневно доколку размислувате за здравјето на срцето, велат експертите од Фондацијата за срце. Тоа и онака е повеќе отколку што повеѓето луѓе најверојатно ќе испијат – околу четири до пет шолји филтер кафе дневно.
Ако сепак планирате да го измерите вашиот крвен притисок, направете го тоа пред или околу 30 минути по пиењето кафе за да бидете сигурни дека тоа нема да влијае на мерењето.
