Речиси е незамисливо да поминеме неколку дена без пристап до интернет. Дали некогаш сте се враќале дома по заборавениот мобилен телефон? Или сте размислувале дека на одмор никогаш нема да заминете без вашиот паметен телефон?
Пристапот до интернет и развојот на модерната технологија која ја имаме на паметните телефони и гаџети и која ни овозможува пристап до голем број на информации, забава, социјални мрежи и слично, ги поттикна експертите да предупредат на можноста за создавање на зависност од интернет и развој на психички пореметувања.
Времето поминато на интернет денес се мери во часови, но кога ќе почнете да ја губите контролата над времето поминато на интернет, време е за првиот аларм. Дека станува збор за зависност, може да укаже и чувството на вознемиреност што се јавува кога не сте онлајн.
Жените трошат повеќе време на социјални мрежи, а мажите најчесто играат игри, бараат порнографски содржини. Се почесто и децата го минуваат времето гледајќи во екранот на паметниот телефон, наместо да се дружат со врсниците и да играат на отворено или да бидат креативни. Токму желбата за осамување и давање предност на „забавата“ на интернет платформите наместо дружење во реалниот свет, може да укажува на проблем, особено ако лицето тешко го контролира времето поминато на интернет.
Освен проблемите на социјално функционирање, поради неправилната положба на телото, наведната глава и претежно седечки начин на живот, може покрај психичките, да се јават и физички тегоби, проблеми со ‘рбетот, синдром на карпален тунел, проблеми со очите, исхрана која се базира на брза храна која со себе носи и други негативни здравствени последици
Ако другите ве предупредуваат дека премногу време поминувате на интернет, дека тешко се контролирате и одвојувате од омилениот екран, ако одбегнувате друштво и социјализација, или забележувате некој од горенаведените здравствени проблеми, консултирајте се со вашиот лекар за да најдете решение за проблемот.
