10– ти мај е Светски ден на лупусот. Станува збор за сериозна промена во животот и болест која бара длабинско разбирање и поддршка на засегнатите лица. Поради тоа, одговорноста е на оние кои не се засегнати, како и оние кои се засегнати од оваа болест, да ги здружат силите и заедно да се вклучат во се што е потребно во борбата против оваа непредвидлива и најчесто погрешно разбрана болест.
Лупус е хронична автоимуна болест која ја зафаќа кожата, зглобовите, бубрезите, црниот дроб. Имунолошкиот систем под нејзино влијание станува хиперактивен и го напаѓа нормалното, здраво ткиво. Таа не е заразна, а повеќето од заболените се жени на возраст од 15 до 45 години.
Дијагностицирањето на лупус е често тешко, бидејќи симптомите ги имитираат знаците на други системски болести. Сепак, една од најголемите карактеристики на оваа болест е осип на лицето во форма на пеперутка. Другите знаци и симптоми вклучуваат:
- Недостаток на здив
- Упорна болка во градите
- Болки во зглобовите, оток и вкочанетост
- Треска и замор
- Прстите на рацете и нозете се претвораат во сино кога се изложени на студ
- Главоболки, конфузија и одредено губење на меморијата
По повод одбележувањето на 15. Светски ден на лупусот, „World Lupus Federation“ упати покана до луѓе од целиот свет да земат учество и да дадат свој придонес на овој ден во знак на поддршка на лицата кои боледуваат од оваа автоимуна болест, која како што велат, погодува граѓани од сите националности, етнички групи, раси, возраст и родови. Оваа состојба не познава граници и тоа не може да се контролира, на она на кое можеме да влијаеме е сфаќањето, разбирањето на лупусот.
Кои се причините?
Лупусот се јавува кога имунолошкиот систем го напаѓа здравото ткиво во вашето тело. Најверојатно тоа е предизвикано од комбинација на гени и влијанија од околината. Лупус може да се развие кај луѓе со наследна предиспозиција за лупус кога ќе дојдат во контакт со нешто во околината што може да го поттикне.
Болеста не е заразна, а повеќето од заболените се жени на возраст од 15 до 45 години
Сепак, во повеќето случаи причината за лупус е непозната, а за потенцијални „предизвикувачи“ се сметаат:
- сончевата светлина;
- инфекција;
- физички или емоционален стрес;
- лекови.
Луѓето кои имаат лупус предизвикан од лекови, обично забележуваат дека симптомите се повлекуваат кога ќе престанат да ги земаат лековите.
Вообичаената функција на имунолошкиот систем е да произведува антитела за да го заштити организмот од антигени, како што се вирусите и бактериите. Под влијание на лупус имунолошкиот систем не може да ги разликува антигените од здравото ткиво и ги насочува антителата кон здравото ткиво предизвикувајќи негово отекување и болка.
Не постојат два исти случаи на лупус. Симптомите можат да се појават одеднаш или да се развиваат бавно, може да бидат благи или тешки, а може да бидат привремени или трајни. Повеќето заболени прво доживуваат епизоди во кои симптомите се влошуваат некое време, потоа се подобруваат или привремено исчезнуваат.
