Доите и пиете алкохол!? Познати се последиците

Австралиските истражувачи утврдиле дека алкохолот може директно да ги оштети детските мозочни клетки, како и да ја намали хранливата вредност на мајчиното млеко

Децата чии мајки консумирале алкохол во периодот на доење, имале послаби резултати на тестовите за когнитивни способности правени на шест и седумгодишна возраст, утврдиле австралиските истражувачи.

Истражувачите од универзитетот „Macquarie“ во Сиднеј нагласиле дека ризикот бил дополнително поголем кај децата, чии мајки консумирале поголеми количини алкохол, особено во ситуации кога биле склони кон опивање.

Според нивните зборови, алкохолот може директно да ги оштети детските мозочни клетки, како и да ја намали хранливата вредност на мајчиното млеко.

Во студијата објавена во стручниот магазин „Pediatrics“, биле користени податоци собрани од околу 5 000 жени и нивните деца


Претходните американските истражувања покажале дека мала количина алкохол која мајката ја консумира за време на доењето не е штетна за бебето, но акцентот е навистина ставен на „мала количина“. Стручњаците советуваат дека доењето треба да следува најмалку два часа по консумирањето алкохол за да се намали неговата концентрација во млекото. Ако, пак, мајката се опила, треба да се почека со доењето до наредниот ден.

Во народот постои верување дека пивото може да има поволен ефект врз производството на мајчиното млеко, но експертите велат дека тоа не е вистина. „Постои старо верување дека еден пијалак може да го подобри производството на млеко, но тоа е всушност сосема погрешно. Ако имате премалку млеко или детето кое го доите сте го родиле прерано, ви препорачувам воопшто да не пиете алкохол“, изјавил д-р Томас Хејл, клинички фармаколог, професор на Медицинскиот факултет „Texas Tech“.