Авторите на студијата анализирале податоци на преку 150 000 случаи на срцев удар, забележани во болниците во период од 7 години. Се покажало дека луѓето најчесто имале срцев удар во понеделник, а најретко во сабота. Ризикот за појава на инфаркт во понеделник е поголем за 11 проценти во однос на деновите од вторник до петок. Кај помладите личности овој ризик е уште поголем во првиот работен ден во неделата и изнесува 20 отсто.
Научниците сметаат дека причината за оваа разлика меѓу понеделникот и останатите работни денови е поголемото ниво на стрес под кој се наоѓаат луѓето на почетокот од работната недела.
Кога станува збор за месеците најмногу срцеви удари се случуваат во декември, а најмалку во јули. Овој заклучок е во склад со резултатите на канадската студија која укажала на тоа дека зачестеноста на срцевите и мозочните удари се зголемува со паѓањето на надворешната температура под нулата.
