Стресот е составен дел од современиот живот, но малкумина размислуваат за неговото влијание врз машката плодност.
Лекарите предупредуваат дека притисокот на работа, семејните обврски и растечките трошоци за живот не влијаат само на менталното здравје, туку можат да имаат и изненадувачки последици врз квалитетот на спермата кај мажите кои планираат семејство, пишува „Унилад“.
Ефектот на хроничниот стрес врз сперматозоидите
Кога телото е под стрес , ослободува хормони како што се кортизол и адреналин. Иако овие хормони се корисни на краток рок, долготрајното изложување на стрес може да предизвика голем број проблеми, од нарушувања на спиењето до намалено либидо, објавува Index.hr.
Д-р Џејмиен Брамхат објаснува како тоа влијае на плодноста .
„На сперматозоидите им се потребни приближно два до три месеци за да се произведат, созреат и да се појават во ејакулатот. Токму затоа хроничниот стрес може да биде значително поштетен од краткотрајните стресни епизоди“, нагласува д-р Брамхат.
Но тоа не е сè.
„Хроничниот стрес може да го зголеми и оксидативниот стрес во телото, што директно ги оштетува сперматозоидите“, додава тој. Истражувањата ја потврдуваат оваа врска, покажувајќи дека повисоките нивоа на стрес се поврзани со помалку сперматозоиди и помала подвижност.
Како да си помогнете себеси?
Д-р Брамхат признава дека не е можно едноставно да се „исклучи стресот“, но им советува на мажите да обрнат внимание на навиките што ги поттикнува стресот, како што се зголемената консумација на алкохол или недостатокот на сон. Тој исто така препорачува редовна физичка активност, која не мора да биде со висок интензитет.
За паровите кои се справуваат со неплодност и чувствуваат притисок, д-р Брамхат нуди конкретен совет: „Држете се подалеку од Фејсбук групи полни со објави за полот на бебето и новороденчиња“.
„Ако веќе се мачите, таков вид содржина не е инспирација, туку гориво за вознемиреност и најбрзиот начин да се чувствувате инфериорно“, објаснува тој.
Кога да побарате медицинска помош
Општа препорака е двојките да побараат медицинска помош ако зачнувањето не се случи по една година обиди или по шест месеци ако партнерот е под 35 години. Сепак, на луѓето со познати фактори на ризик им се препорачува да се консултираат со лекар уште порано.
Важно е да се нагласи дека стресот не е единствената причина за машка неплодност. Д-р Боби Наџари ја наведува варикоцелата, или проширувањето на вените во скротумот, како една од најчестите причини. Оваа состојба може да го намали производството и подвижноста на сперматозоидите.
Можни знаци на варикоцела се тестиси со нееднаква големина или грутка во скротумот. На секој што се бори со неплодност му се препорачува да посети лекар за да се утврди точната причина за проблемот и да се одреди соодветната терапија.
