Лошиот сон е поврзан со развојот на деменција и Алцхајмерова болест, а сега нова студија сугерира можна причина зошто е тоа така. Имено, се покажало дека мала група млади, здрави мажи, кои биле ускратени за само една ноќ сон, имала повисоко ниво на тау протеин во крвта, отколку кога спиеле цела ноќ.
Според мислењето на стручњаците, овие резултати се интересни оти таложењето на тау протеинот се гледа во мозокот на поединци кои се погодени од Алцхајмерова болест, или во најчестите форми на деменција.
Треба да се спомене дека не е воочен пораст на нивото на бета амилоидот, вториот протеин во мозокот кој се поврзува со Алцхајмеровата болест.
Во последниве неколку години, се повеќе студии го поврзуваат тау протеинот со развојот на оштетувања во мозокот и со Алцхајмер.
Тау протеинот може да се најде во нормално активните неврони и обично брзо се отстранува од мозокот. Кај пациентите со Алцхајмерова болест, тау протеинот се таложи и останува во мозокот.
