Претстојните празници се замислени како идилично време од годината – се печат и јадат прекрасни мирисливи колачи и јадења, се пакуваат и отвораат подароци, се пеат песни, се оди на гости… Но не е се така идеално – последното истражување покажува дека дури 61 процент од луѓето се жалат на лоши односи со партнерите за време на празниците.
Повеќе од 35 отсто испитаници одговориле дека често се бесни и лути во овој период од годината
Се прашувате од каде доаѓаат овие негативни емоции во време кога треба да владее празничен дух, мир и спокојство? Одговорот го има во резултатите на студијата на „Harris Interactive AG“, во која биле опфатени 1 000 лица. Тие покажуваат дека паровите се расправаат за своите финансии околу три пати месечно, додека половина од испитаниците изјавиле дека главната причина за расправија е неочекуваното трошење пари.
Во време на празници секогаш се троши повеќе, а со тоа бројот на расправиите значително се зголемува. Бидете смирени и имајте разбирање. Не дозволувајте да влезете во празничната стапица. Празниците се скапи, треба да издвоите пари за подароци, а сигурно сакате и нова гардероба, барем за дочекот на Новата година. Ако имате деца и поголемо семејство, постои голема можност да се соочите со уште поголем финансиски стрес. Во таква ситуација понекогаш е тешко да се размислува рационално, а тоа може да предизвика конфликт меѓу паровите. Сепак имајте на ум дека ако ви недостасуваат финансии, не се задолжувајте, туку бидете скромни во подароците. Духот на празниците не се подароците и раскошот, туку времето минато во мир и спокојство со вашите најблиски.
