ЕМОТИВНА ИСПОВЕД НА АНЕТА КАЧУРКОВА: Поради стрес ми падна косата, сега носам перики и марами!

Дека никогаш не можеш да знаеш што ќе ти донесе денот не е само обична изрека, туку и голема животна вистина, а дека тоа навистина е така потврдува и животната приказна на пејачката и авторка Анета Качуркова.

Храброста претставува еден вид сила, моќ или решителност да се соочиме со големите предизвици коишто се исправуваат пред нас. Секогаш кога се соочуваме со потешкотии, застрашувачки или болни времиња, потребна е храброст за да го пребродиме тоа! Токму ваква – храбра и инспиративна е и животната приказна на Анета Качуркова која беше дел од составот П.С, потоа продолжи и со соло кариера, а моментално живее во Париз каде работи и паралелно студира. Имено, пејачката и авторка повеќе од десет години боледува од алопеција ареата – автоимуна болест, при која имунолошкиот систем, кој е задолжен да го штити организмот од надворешни елементи како што се вирусите и бактериите, по грешка ги напаѓа фоликулите на косата при што може да доведе до опаѓање на косата на главата и сите други места. Бидејќи не постои третман против алопеција ареата, ниту, пак, ефикасни лекови за спречување на опаѓањето на косата, пејачката веќе долги години носи перика и марами, но вели дека благодарение на болеста успеала да се изгради како личност, а се лечи со песна и мелодија.

Дека никогаш не можеш да знаеш што ќе ти донесе денот не е само обична изрека, туку и голема животна вистина, а дека тоа навистина е така потврдува и Вашата приказна која, пред се, е многу инспиративна. Пред десет години Ви дијагностицираа алопеција ареата, за каков здравствен проблем точно станува збор?

Анета: Тој здравствен проблем се нарекува алопеција ареата. Ме изгради како личност и ми даде храброст да си го остварам сонот. Ме научи да се слушам себе си вистински, и да се сакам во секоја ситуација. Да комуницирам директно и едноставно, и да се фокусирам на она што е навистина важно – љубовта, сочувството, сомилоста, едноставноста.

Како се носите со болеста, Ви требаше ли време за да прифатите и сфатите што Ви случува ?

Анета: Се уште носам перики и марами. Одлучив да ја прифатам наместо да се борам. Тоа е најдобро нешто што можев да си го подарам на себеси. Да застанам пред себе си и светот и да кажам „ова сум јас во овој момент“ и одам понатаму со животот. Немам потреба да сум физички совршена, изгледот е минлива работа. Фокусот ми е на она што е трајно. Душата, изворот на животната сила, хармонија со себеси и тие околу мене и, секако, музиката.

Важите за исклучително храбра жена, потврда за тоа е настапот на домашниот Евросонг кога настапивте со избричена глава и на тој начин и покажавте на јавноста дека на нозе треба да се дочекаат сите лоши нешта кои ги носи животот. Ви беше ли тешко да се одлучите за тој чекор?

Анета: Ми беше тешко. Таа година пред настапот, цела слика за себеси ми се сруши и не сакав да излегувам од дома. И во еден момент ми текна „или ќе се кријам цел живот и ќе бидам роб на несигурноста и ниската самодоверба или ќе се ослободам од сите комплекси“. Се одлучив за второто. Кога јавно излегов и комуницирав за тоа што ми се случи, наидов на толку сомилост и поддршка од сите, што веќе немав проблем. Прекрасно искуство!

Како се чувствувате сега, после повеќе од 10 години поминати од тогаш?

Анета: Се чувствувам како дете!

И покрај многуте професионални обврски кои ги имате, успевате ли да најдете време за себе? Дали се уште ги практикувате јогата и медитацијата?

Анета: Духовната работа ми е како здивот, медитирам и во метро и кога снимам музика. Цело време се запрашувам „дали ова што го правам е во хармонија со Универзумот?“ и така донесувам одлуки. Настојувам сите духовни лекции што ги научив да ги применам во секојдневниот живот. Дури и да мијам садови со љубов. Да изразам благодарност на се во мене и околу мене.

Домашната јавност Ве запозна преку триото П.С. кое беше доста популарно пред скоро 20 години, Ви недостасуваат ли тие времиња, какви спомени Ви будат?

Анета: Ми будат чувство на гордост, што од толку мали години се трудевме да направиме квалитетна музика. Се уште ја имам истата страст креирам. Ми фали секој ден мојата прва љубов, П.С. Ми недостасува ентузијазмот што Македонија го имаше за македонската музика. Но, за среќа, тоа што се уште ни остана е сестринската љубов меѓу мене, Геновева и Јулија. Тие две ми се музи, и се гордеам на нивните успеси.

Иако веќе извесен период не сте во Македонија, сепак музиката повторно е Ваша примарна професија и интенизивно работите на нови проекти и теми. Деновиве објавивте неколку интересни фотографии на социјалните мрежи од снимање, па дали ќе можете да ни кажете за што точно станува збор и на што работите во моментов?

Анета: Уште пред да дојдам во Париз потпишав договор со музички издавач од Лондон и станав дел од издавачката куќа “Moods and Modes”. Компонирам неколку проекти за нив, се издаде повторно мојот прв албум наречен “UniversaLove” во март оваа година, и е достапен на JunoDownload, Spotify и Apple Music. Во меѓувреме во Париз дојдов да учам нешто ново на “American School of Modern Music”  и направив своја група со  музичари. Моментално сме во подготовки на новиот албум и овој месец го завршивме снимањето на спотот за првиот сингл наречен “Give it time”.

Музиката отсекогаш била Ваша прва и најголема љубов, тоа повеќе пати до сега го имате потенцирано, дали уште го имате истиот став и размислување?

Анета: Да! Таа е природата на мојата душа. Размислувам повеќе во мелодии отколку зборови. Всушност се испреплетуваат, мелодии со слики, чуства, искуства. За мене музиката она е преку кое го разбирам и восприемам светот, музика како размена на енергија и комуникација. Многу често го опсервирам својот ум како се однесува при процесот на креирање музика. Сите мисли престануваат (особено оние негативните) и цела животна енергија се насочува кон една мелодија, и имам чувство на експанзија како да ми се шират градите, и течам како река. Најголем комплимент ми е кога ми кажуваат дека мојата музика и глас имаат исцелувачки ефекти. Тоа за мене е свето.

За крај, што ќе им порачате на читателите на Panacea.mk, кој е Вашиот рецепт за здравје, позитивна енергија и насмевка?

Анета: Мојот рецепт е тоа што константно си повторувам на себе си „Жал ми е, прости ми, те сакам, ти благодарам.“ Пробајте!

aleksandra@panacea.mk