Ендометриоза и стерилитет – од поставување дијагноза до бременост

Еден од најголемите стравови на жените, на кои им е дијагностицирана ендометриоза е дека нема да можат да забременат. Меѓутоа шансите за успешно зачнување се поголеми од што се мисли.

Ендометриозата е раст на ендометриумот надвор од матката. Тоа не се случува само во матката, туку и на други места во стомакот, како што се јајцеводите, јајниците … Околу 10 отсто од неплодните двојки се погодени со ендометриоза. За жените со овој проблем месечните шанси за забременување се намалуваат од 12 до 36 отсто.

Симптоми

Тешки, болни и долги менструации, ректално крвавење и предменструално точкасто крвавење. Меѓутоа, понекогаш воопшто и не постојат симптоми, заради фактот дека не постои корелација меѓу степенот на болеста и тежината на симптомите.



Колкави се шансите за зачнување и што жените можат да сторат за да ги искористат сите можности?

Постојат три можни начини за зачнување со дијагностицирана ендометриоза, а тоа се: по природен пат, лапароскопска хируршка интервенција и вонтелесно оплодување.



Зачнување по природен пат

Студии покажале дека жените со поодминат стадиум на ендометриоза имаат од 2 до 10 отсто шанси да забременат. Доколку еднометриозата е во почетна фаза (ниво I или II) жената има мошне добри шанси да забремени по природен пат.

Лапароскопска хируршка интервенција

Најточната дијагноза може да се постави само со помош на дијагностичка лапароскопија, метод што му овозможува на лекарот директно да ја види матката, јајцеводот и карличната шуплина. Лапароскопската интервенција е осмилена така делови од ендометриумот да се отстрануваат од сите околни органи, особено од јајцеводите, со цел нивно враќање во нормална функција. Студиите покажале дека е зголемен бројот на жени кои имале блага ендометриоза, а кои забремениле после направениот зафат – дури 63 отсто од жените забремениле во рок од две години по интервенцијата. Треба да се напомене дека ендометриозата може да се врати.

Вонтелесно оплодување

Шансата за зачнување со помош на вонтелесно оплодување кај жените кои имаат ендометриоза се 39,1 отсто, на сите возрасти. Истражувањата покажуваат дека успешноста на вонтелесното оплодување опаѓа, како што степенот на еднометриоза расте. Меѓутоа глобално гледно вонтелесното оплодување успешно ги зголемува шансите за зачнување.