Додека едни сакаат да спијат во потполна темнина, други оставаат барем вклучена лампа преку ноќ. Но, научниците откриваат зошто не е добро да спиете во осветлена соба.
Спиењето во осветлена соба може да доведе до развој на дијабетес тип 2, бидејќи го спречува производството на инсулин, покажало ново истражување. По само една ноќ помината во осветлена соба, испитаниците имале поголема инсулинска резистенција, откриле американските научници.
Инсулинската резистенција е намалена способност на клетките да реагираат на хормонот кој ја транспортира глукозата до крвотокот и е поврзан со дијабетесот тип 2.
Претходни истражувања покажале дека изложеноста на светло преку ноќ го потиснува производството на хормонот мелатонин кој е важен за спиењето, а има и улога во одржувањето на нивото на шеќерот во крвта. Мелатонинот се произведува во мозокот како одговор на темнината и го регулира циклусот на спиење и будење.
„Нашите откритија покажуваат дека само една ноќ на изложеност на светло за време на спиењето, влијае на инсулинската резистенција. Изложеноста на светло додека спиете му пречи на сонот, а ова истражување покажува дека има и потенцијал да влијае на метаболизмот„ вели авторот на оваа студија д-р Ајви Чонг Мејсон.
Овие откритија се многу важни со оглед на честата употреба на вештачко осветлување, истакнува д-р Мејсон и додава дека се потребни понатамошни истражувања за да се утврди колку се долготрајни последиците што ги остава изложеноста на светло.
