ФИЗИЧКИ СИМПТОМИ НА СТРЕС: Ова се предупредувачки знаци што ви ги испраќа телото

Физичките симптоми на стрес се јавуваат кога поединецот е изложен на секојдневен и хроничен (долгорочен) стрес, што е секојдневна појава во современиот живот. Стресот е одговор на телото на секоја ситуација што се случува во животот. Кога ќе се појави закана, телото ослободува хормони кои го подготвуваат за борба или бегство.

Иако одредено ниво на стрес е нормално, па дури и корисно, хроничниот стрес може негативно да влијае на здравјето. Кога човек постојано е подготвен на “борба или бегање“ како одговор, телото никогаш не добива шанса да се опушти и ресетира. Ова може да доведе до различни физички симптоми, како и ментални и емоционални проблеми.

ФИЗИЧКИ СИМПТОМИ НА СТРЕС

Симптомите на стрес се манифестираат на различни начини. Додека кај некои луѓе може да преовладуваат физички симптоми на стрес, други може да имаат повеќе емоционални проблеми или симптоми поврзани со однесувањето. Во продолжение дознајте кои се најчестите физички симптоми на стресот.

ЗАМОР

Постојаното чувство на замор е вообичаен симптом на стрес. Кога телото е под хроничен стрес, надбубрежните жлезди произведуваат вишок кортизол, што може да доведе до замор. Ова на крајот може да доведе до замор на надбубрежните жлезди, состојба кога надбубрежните жлезди не се во можност да произведат доволно хормони.

ГЛАВОБОЛКА

Стресот може да предизвика тензична главоболка или мигрена кај некои луѓе. Ова се должи на зголемената напнатост на мускулите која се јавува кога сме под стрес. Тоа е исто така резултат на зголеменото производство на кортизол, како и потиснати и неослободени фрустрации. Во траење од половина час до неколку часа, овие главоболки се чувствуваат како притисок на двете страни на главата и може да бидат придружени со напнатост во вратот и рамената.

ДИГЕСТИВНИ ТЕГОБИ

Стресот може да предизвика различни гастроинтестинални проблеми, вклучувајќи дигестивни пречки како жиговина, дијареа и запек. Причината за тоа е што стресот може да го стимулира лачењето на стомачни киселини, како и да ја забави дигестијата или варењето.

БОЛКА ВО ТЕЛОТО

Хроничниот стрес може да доведе до болки во мускулите и вкочанетост, како и до болки во зглобовите. Ова веројатно се должи на зголемената мускулна напнатост која се јавува кога сме под стрес. Најчести точки во телото за овие болки се вратот, рамената и долниот дел на грбот.

ЗАБРЗАНА РАБОТА НА СРЦЕТО

Тоа е уште еден физички одговор на стресот. Кога е под стрес, телото ослободува хормони поради кои срцето побрзо чука. Ова може да биде последица и на зголемен крвен притисок кој се јавува при стрес.

ПРОМЕНИ ВО ЛИБИДОТО

Стресот може да предизвика пад на либидото, како и еректилна дисфункција кај мажите. Ова се должи на зголеменото ниво на стрес хормони во телото.

КОЖНИ ПРОБЛЕМИ

Стресот може да предизвика различни проблеми со кожата, вклучувајќи акни, егзема и псоријаза. Зголеменото производство на кортизол може да доведе до воспаленија.

ОПАЃАЊЕ НА КОСАТА

Стресот може да предизвика губење на косата кое може да биде привремено или трајно. Ова веројатно се должи на фактот дека стресот може да поттикне зголемување на хормоните кои доведуваат до губење на косата.

ПРОБЛЕМИ СО ТЕЖИНАТА

Некои луѓе се прејадуваат кога се под стрес, додека други целосно го губат апетитот. Стресот дополнително може да доведе до лоши навики во исхраната и емоционално прејадување што предизвикува зголемување на телесната тежина. Напротив, некои луѓе може да ослабат поради фактот што стресот може да доведе до намален апетит и губење на интерес за храна.

ПРОБЛЕМИ СО СПИЕЊЕТО

Стресот може да предизвика проблеми со спиењето, како несоница или немирен сон, бидејќи влијае на нивото на хормони во телото кои можат да го нарушат циклусот на спиење.

ЧЕСТИ НАСТИНКИ

Стресот, исто така, може да го ослаби имуниот систем, што го прави организмот поподложен на настинки и инфекции.