Фотографии на човековата кожа под УВ светлина ја откриваат штетата што таа ја трпи од сонцето

Францускиот фотограф Пјер Луис Ферер прави портрети на модели под поинакви услови, односно под ултра виолетова светлина за да покаже колкаво е всушност оштетувањето на кожата од сонцето или солариумот.

Шокантните портрети под ултравиолетови зраци ја откриваат вистинската штета од сонцето која е невидлива за човековото око. Низ црнобелите фотографии се покажуваат дамките предизвикани од сонцето кои не ги гледаме под обична светлина. Секоја фотографија му овозможува на моделот да види и открие нешто за себе што никогаш порано не го видел, а интересно е дека ова е спротивно на селфито со кое луѓето и фотографите сакаат да ја прикажат реалноста многу подобра отколку што е. Овде всушност се покажува состојбата на телото која е невдилива за човековото око.

„Одушевен сум од идејата да видиме повеќе од реалното. Сакав да направам серија од УВ портрети за на луѓето да им понудам да ја видат и својата друга невидлива страна“, рекол Ферер, инаку поранешен оптички инженер од Париз кој за реализацијата на овој проект користел посебна опрема за зумирање на кожата.

УВ светлината е главна причина за рак на кожата, а главни извори се сончевата светлина, но и солариумите. УВ се состои од три вида зраци – УВА и УВБ, кои влијаат на тоа клетките во кожата побрзо да стареат и ја оштетуваат ДНК, што доведува до тумори.

Третиот вид зраци се нарекува УВЦ и тој би бил уште поштетен, но, за среќа, не може да продрат во Земјината атмосфера.