ГИХТ: „Болеста на кралевите“ е дваесет пати почеста кај мажите

Гихтот се јавува како резултат на депонирање на кристали на мононатриум урат од хиперурикемичните телесни течности во ткивата

Консумирање два литра течности, здрав начин на живот, исхрана без месо и алкохол, секојдневно вежбање, се основните препораки при појава на гихт, уричен артритис или подагра, кој се јавува како резултат на депонирање на кристали на мононатриум урат од хиперурикемичните телесни течности во ткивата. Гихтот уште се нарекува и болест на кралевите, бидејќи главно се развива како резултат на дебелина, прекумерна консумација на месо и/или алкохол. Кои се неговите симптоми?

  1. Силна болка во зглобовите

Гихтот предизвикува ненадејни напади на силна болка во зглобовите. Може да биде погодена и целата нога, коленото, целата рака, зглобот на раката или лактот.

  1. Пречувствителна кожа

Силна болка во еден или повеќе зглобови обично се јавува во текот на ноќта. Болката се зголемува, зглобот отекува, а кожата над зглобот станува пречувствителна, црвена или виолетова, напната, сјајна и топла.

  1. Болни допири

Допирањето на кожата над зглобовите може да биде многу болно. При акутен напад на гихт, исто така, може да се појави треска, слабост и забрзана работа на срцето.

  1. Сериозни оштетувања

Гихтот може да предизвика сериозни оштетувања на зглобовите и тетивите. Зафатените зглобови може трајно да се оштетат и деформираат.

  1. Почесто се јавува кај мажите

Гихтот е 20 пати почест кај мажите отколку кај жените. Обично ги погодува средовечните мажи и жени по менопаузата. 

  1. Други болести

Заболените од гихт често страдаат и од други болести, како што се покачен крвен притисок, дијабетес, срцеви заболувања, покачени масти во крвта, камења во бубрезите, дебелина…