Го свирела Моцарт додека и го оперирале мозокот!

60-годишната Елишув била виолинистка на литванскиот национален симфониски оркестар и израелскиот камерен оркестар, но тресењето ја принудило да ја скрати кариерата и да стане професорка по музика

Израелската музичарка Наоми Елишув свирела виолина додека лекарите со операција се обидувале да и го отстранат туморот на мозокот којшто и ја прекинал кариерата.

Началникот на неврохируршкото одделение во болницата Соураски во Тел Авив Јицак Фрид рекол дека операцијата на мозокот на Наоми Елишув била изведена додека таа била будна за да може прецизно да се одреди каде да ја постават електродата.

 „Таа мора да биде поставена точно до милиметар“, изјавил тој.

Затоа побарал од Елишув да свири на својот инструмент за да биде сигурен дека стимулацијата на мозокот со електрода го отстранила туморот без нус-појави, пренесува Ројтерс.

„Ова е првпат да оперирам пациент што свирел за време на зафатот. Многу ми е драго што присуствував на концерт на талентирана и ценета музичарка“, додал докторот.

60-годишната Елишув била виолинистка на литванскиот национален симфониски оркестар и израелскиот камерен оркестар, но тресењето ја принудило да ја скрати кариерата и да стане професорка по музика.

Операцијата била извршена низ дупка во черепот низ која во еден од мозочните центри за движење била внесена електрода од 1,3 милиметри.

 „Кога погодивме нешто, се слушна совршен Моцарт. Тресењето повеќе го немаше“, изјавил Фрид.

 „Виолината е мојата најголема љубов. Трепетот ме сопре во професионалното свирење, а тоа беше тешко за жена како мене, која свирела цел живот“, кажала Елишув. Сега едвај чека да му се врати на нормалниот живот.

Што е трепет?

Забележливо неконтролирано тресење на целото тело, екстремитетите или одредени групи мускули, по брзо повремено грчење. Трепетот може да биде симптом на некое органско, невролошко или психичко заболување, но и нормална минлива појава. Овие повеќе или помалку ритмични осцилации можат да имаат различна сила – од едвај забележливо до многу големо тресење, кое може да предизвика целосна неспособност кај луѓето.