Лицата со хронична болка во голем дел не можат да ги извршуваат секојдневните активности, а често се случува околината да не ги доживува сериозно.
Хроничната болка е еден од најважните здравствени проблеми, а статистичките податоци покажуваат огромно негативно влијание на хроничната болка на поединците, семејството и работниот колектив. Хроничната болка сериозно го намалува квалитетот на живот на се повеќе луѓе во светот. Според лекарите, хроничната блка предизвикува комплексен склоп на физички, психолошки, но и социјални промени кај пациентот.
Хроничната болка може да биде површинска и длабинска, што зависи од местото на болното подрачје. Се разликува остра и подмолна болка. Хроничната болка трае шест месеци и повеќе и најчесто е знак на некоја хронична болест. Хроничната болка се дели на онаа која е поврзана со карцином и немалигна хронична болка.
Хроничната болка е упорна и покрај фактот што одредената повреда е излекувана и упатува на тоа дека се уште постои активност во нервниот систем. Физичките нуспојави вклучуваат: напнати мускули, ограничена подвижност, намалена енергија и промена на апетитот.
Емоционалните нуспојави опфаќаат лутина, нервоза и страв од повторна повреда. Таквиот страв може да му пречи на способноста на пациентот за враќање во нормалната рутина и секојдневните обврски. Најчесто хроничната болка се поврзува со главоболката, болка во долниот дел на грбот, болка предизвикана од карцином, болка поради артритис, невролошка болка, како и психогена болка.
Стручњаците истакнуваат дека жените со хронична болка, болката ја доживуваат многу поинтензивно и подолготрајно од мажите. Според нив, важно е да се запомни дека хроничната болка понекогаш е и одделна болест (сама за себе).
Причините може да бидат физички, социјални и духовни, што е опфатено со поимот тотална болка. Болката, велат лекарите е субјективно искуство кое не се мери лесно. Кај хроничната болка се активираат бројни процеси во мозокот. Докажано е дека во мозокот не постои единствен центар за болка, туку дека при чувството на хронична болка од голема важност е моменталната емотивна состојба и начин на размислување за болката.
